NBA афсонаси, меҳрибон ота ва «Оскар» мукофоти соҳиби Коби Брайант ҳақида
2020 йил, 26 январь куни NBA’нинг афсонавий баскетболчиси Коби Брайант шахсий вертолётида ҳалокатга учраб воқеа жойида вафот этди. Ушбу фотомақола орқали Брайант фаолиятига оид маълуматлар тақдим этилади.
Коби Брайант 1978 йилнинг 23 августида Филадельфияда профессионал баскетболчи Жо Брайант оиласида туғилган. Болалиги Италияда ўтган, унинг отаси ўша вақтлари италян клубларида фаолият юритарди. Уч ёшидан бошлаб баскетбол ўйнашни бошлаган. Ёшлигидан «Лос-Анжелес Лейкерс» ишқибози бўлган.
1991 йилда Брайантнинг оиласи Италиядан АҚШга қайтади. Филадельфияда Коби мактаб баскетбол жамоасида ўйнашни бошлади, унинг жамоаси штат чемпионига айланди. Мактабдан кейин 1996 йилда «Шарлотт Ҳорнец» клубида NBA’даги фаолиятини бошлади, шундан кейин «Лос-Анжелес Лейкерс»га ўтди.
«ЛА Лейкерс»даги 20 йиллик фаолияти мобайнида Коби Брайант беш бор NBA чемпионлигини қўлга киритди (2000, 2001, 2002, 2009 ва 2010 йилларда) ва 2008/09 йилги мавсумнинг энг яхши ўйинчиси деб топилди. 2009 ва 2010 йиллари NBA финал босқичининг энг яхши баскетболчисига айланди. Шунингдек, у 18 марта NBA юлдузлари учрашувида қатнашди, 15 бор юлдузлар терма жамоасидан ўрин олди.
Брайант ўзини «Қора мамба» деб атарди. Бу илоннинг ҳужумдаги мукаммал ҳаракати ва ўз салоҳиятидан унумли фойдалана олиши Кобини илҳомлантирганди.
Брайант ўзининг сермаҳсуллиги билан машҳур. У фаолияти мобайнида 33 643 очко тўплашга эришган ва NBA тарихидаги энг яхши ўнта мерган рўйхатига кирган
Халқаро фаолияти мобайнида Брайант АҚШ терма жамоаси билан икки бор Олимпиадада чемпион бўлган (2008 ва 2012 йилларда), шунингдек, 2007 йилда Америка чемпионатида олтин медалга эга чиққан
Брайант энг кўп даромад кўрадиган спортчилардан бири эди. Унинг Nike, Adidas, Coca-Cola, Turkish Airlines, Nutella ва бошқа компаниялар билан тузган битимлари катта даромад олиб келарди. Шунингдек, Коби Nintendo ва Kobe Inc. компаниялари билан бирга шахсий видео ўйинлар сериясини чиқарган.
Коби Брайант АҚШ шаҳарларида болалар учун комплекс дастурлар яратиш билан шуғулланадиган After School All Stars нотижорат компаниясининг элчиси эди. Шунингдек, Коби Хитойда таълим ва соғлиқни сақлаш соҳасидаги дастурларни қўллаб-қувватловчи фондни ишга туширган. 2019 йили Брайант баскетбол бўйича Жаҳон чемпионати FIBA’нинг Хитойдаги расмий элчиси этиб тайинланганди.
2017 йилда Kobe Inc. ва аниматор Глен Кин студияси ҳамкорликда «Қадрли баскетбол» номли беш дақиқалик мултфильмни намойиш этди. Мултфильм Брайант фаолиятини якунлаган вақтда ёзган хати асосида ишланганди.
2018 йилнинг март ойида Брайант «Қадрли Баскетбол» учун энг яхши қисқаметражли мултфильм йўналишида «Оскар» мукофотига эга бўлди.
2020 йилнинг 26 январь куни бортида Брайант бўлган шахсий вертолёт Калабасас шаҳрида ҳалокатга учради. Вертолёт бортида бўлган беш йўловчининг барчаси вафот этди. Коби Брайант 41 ёшда эди.
Вертолётда Кобининг 13 ёшли қизи Жанна Брайант ҳам бўлган. Коби Жижини ўзининг баскетболдаги вориси деб билар ва унинг машғулотларини мунтазам кузатиб борарди.
