Навоий вилоятида автомобилини жарима майдончасидан чиқариш учун ЙПХ инспекторига 500 минг сўм пора беришга уринган ҳайдовчи қўлга тушди, деб хабар бермоқда ИИВ матбуот хизмати.
Маълум бўлишича, 24 январь куни соат 11:30 ларда Қизилтепа тумани ҳудудида авторейд тадбири доирасида туманнинг «Оқ олтин» маҳалла ҳудудида жойлашган чорраҳада ҳаракатланиб келаётган фуқаро Ф.Қ. бошқарувидаги Damas автомашинаси ҳужжатларини текшириш учун тўхтатилган.
Ҳайдовчи Ф.Қ.нинг ёнида автомашинани бошқаришга оид ҳужжатлари бўлмаганлиги сабабли унга нисбатан тегишли тартибда маъмурий баённомани расмийлаштириб, автомашина Қизилтепа туманида жойлашган «Кушарти автосервис кафолат» МЧЖга қарашли автомашиналарни тўхташ жарима майдонига жойлаштирилган.
Ф.Қ. автомашинани жарима майдонидан чиқариб бериш ва маъмурий баённомани автомашинанинг эгасини номига расмийлаштириб бериши эвазига ЙПХ ходимига 500 минг сўм пора таклиф қилган. Инспектор бу ҳолат ноқонуний эканлигини тушунтирган бўлса-да, пора таклиф қилишда давом этгани сабабли унга нисбатан қонуний чора кўришни сўраган.
Мазкур ҳолат юзасидан ИИВ Ўз хавфсизлиги бошқармаси Навоий вилояти бўйича бўлими ходимлари томонидан ўтказилган тезкор тадбир жараёнида шу куни соат 19:15 да автомашиналар жарима майдончаси биносида фуқаро Ф.Қ. ЙПХ инспекторига 400 минг сўм пора бераётганида тезкор тадбир қатнашчилари томонидан далилий ашёлар билан ушланган.
Ҳозирда мазкур ҳолат юзасидан ИИВ Ўз хавфсизлиги бошқармаси Навоий вилояти бўйича бўлими томонидан терговга қадар текширув ҳаракатлари олиб борилмоқда.
Изоҳ (0)