Ўзбекистонда корхона ва ташкилотларда ишловчиларнинг ўртача ойлик номинал иш ҳақи 2,3 миллион сўмни ташкил этди. Давлат статистика қўмитаси ҳисоботида қайд этилишича, бу 2018 йилнинг мос даврига нисбатан 30,1 фоизга кўп.
Бу қўлга бериладиган иш ҳақи эмас. Ўртача ҳисобланган номинал иш ҳақи ҳудудда рўйхатдан ўтган ташкилотлар сони, иш ҳақи фонди ва ҳодимлар сони каби бир неча омилларга қараб ҳисоблаб чиқилади.
Унинг таркибига устама, мукофот, рағбатлантириш хусусиятига эга тўловлар, компенсация ва ишланмаган вақт учун ҳақ каби тўловлар ҳам киритилган. Шунингдек, унинг таркибида жисмоний шахслар даромад солиғи ва касаба уюшмасига тўловлар ҳам мавжуд.
Республика бўйича 2019 йил январь—декабрь ойларида 2018 йилнинг мос даврига нисбатан иқтисодий фаолият турлари бўйича ўртача ойлик номинал ҳисобланган иш ҳақи яшаш ва овқатланиш бўйича хизматларда 40,1 фоизга, банк, суғурта, лизинг, кредит ва воситачилик фаолиятида 37,2 фоизга, таълим соҳасида 33,3 фоизга, соғлиқни сақлаш ва ижтимоий хизматлар кўрсатишда 31,0 фоизга, савдода 24,7 фоизга, санъат, кўнгил очиш ва дам олишда 22,6 фоизга, саноатда 21,3 фоизга, қурилишда 20,5 фоизга, ахборот ва алоқада 19,3 фоизга, ташиш ва сақлашда 18,4 фоизга ўсганлиги кузатилган.
Ўзбекистон Президентининг 2019 йил 12 июлдаги «Иш ҳақи, пенсиялар, стипендиялар ва нафақалар миқдорини ошириш тўғрисида»ги фармонига мувофиқ, 2019 йилнинг 1 сентябридан бошлаб меҳнатга ҳақ тўлашнинг энг кам миқдори 634 880 сўмни ташкил этади.
Изоҳ (0)