27 январь — ўзбек телетомошабинларига «Қашқирлар макони» сериалида Чақир роли билан таниш бўлган Октай Кайнаржанинг туғилган куни. Актёр 1965 йил Туркиянинг Малатья шаҳрида дунёга келган. Октайнинг отаси Германияда ишлагани сабаб унинг болалиги онаси билан ўтган. Лицейни тамомлагач, Fiat фабрикасида электрчи бўлиб ишлаган ва шу билан биргаликда, Консерваторияга кириш имтихонларига тайёрланган.
Октайнинг профессионал актёр сифатидаги илк фаолияти Эгей театридаги «Деворнинг нариги тарафи» спектакли бўлган. Кейинчалик актёр бир қанча болалар спектаклларида роль ижро қилган. 1991 йилда Истанбул давлат консерватория университетининг, кино ва театр актёрлиги факультетини тамомлаган. Талабалик давридаёқ ТRT1 каналидаги сериалларга роль ижроси учун таклиф қилинган. 1990—1997 йиллар Октай кўплаб телевизион шоу ва кўнгилочар дастурларда суратга тушган.
Университетни тамомлагач, «Қондош-қардош» театридаги ролидан сўнг 1993—1994 йилларда «Иккинчи даражали энг яхши театр актёри» деб топилган. Кино соҳасидаги «Севги фильмларининг унутилмас режиссёри», «Қисқичбақа савати», «Бир аёл анатомияси» фильмларидаги турли роллари, «Олтин апельсин» кинофестивалида энг яхши иккинчи даражали актёр деб топилишига сабаб бўлган.
Нафақат Туркияда, балки, бошқа мамлакатларда ҳам севиб томоша қилинган «Қашқирлар макони» сериалидаги Сулаймон Чақир ижроси Октайнинг карьерасидаги энг муваффақиятли роль бўлган. Шундан кейин актёрга турли шоу ва дастурлар, бадиий фильмларда иштирок этиш учун тинимсиз таклифлар келиб тушган. 2007 йилдан бугунга қадар у ўндан ортиқ фильм ва сериалларда суратга тушган.
Унинг шахсий ҳаётига назар ташланса, умр йўлдош танлашда инжиқ эканига гувоҳ бўлиш мумкин. Негаки, матбуотда актёр шахсий ҳаёти билан боғлиқ хабарлар тарқалиши билан орадан кўп ўтмай муносабатларга барҳам берилгани ҳақидаги миш-мишларни кузатиш мумкин. 2008 йилда Октай Озгу Намал билан 7 йиллик муносабатларига чек қўйган. 2012 йилда эса Мелек Уйгун билан турмуш қурган, лекин 2 йилга қолмай ажрашган. 2015 йилда «Ёмонлик дунёга устун бўлмас» сериалидаги бош қаҳрамон образини жонлантирган ва суратга олиш жараёнида таниқли актриса Дениз Чақир билан ўрталарида илиқ муносабатлар пайдо бўлган. Мухлислар юлдузли жуфтликнинг муносабатларидан хурсандчилиги кўпга бормаган.
Қуйида«Қашқирлар макони» сериалида Октай Кайнаржа томонидан айтилган иқтибосларни эътиборингизга ҳавола этамиз.
Изоҳ (0)