Ёдгор Саъдиев «Шайтанат» сериалида Зайнаб ролини ижро этган актриса алмашиб қолиши сабабини маълум қилди (видео)

Ўзбекистон ва Қорақалпоғистон халқ артисти Ёдгор Саъдиев «Дарё» интернет-нашри учун эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Ёдгор Саъдиев суҳбат давомида «Шайтанат» сериалидаги Асадбекнинг қизи Зайнаб образини ижро этаётган Наврўза Бийназарова сериалнинг 7-қисмида актриса Раъно Шодиевага алмашиб қолиш сабаби ҳақида гапириб берди.

https://youtu.be/Z6Nz7T-6CjM?t=1h32m3s

Буни очиқ айтишим мумкин. Бу масалада юрагим хуруж қилишига озгина қолган. Бу ишланган нарса, мен буни аниқ биламан. Ҳозир гапиришни ҳожати ҳам йўқ. Зайнаб ролини ижро этаётган Наврўза Бийнозова келди-да, мен ҳали турмушга чиқмаганман, у қиз ‘наркоман’ бўлар экан, деди. Лекин сен ўқиган эдинг-ку! Йўқ, мен ўйнамайман деган. Ана ундан сўнг менда жуда катта муаммо пайдо бўлди. Кейин мен ўйлай бошладим. Очиғини айтсак, ўзи мен бошида Наврўза Бийнозовани Зайнаб ролини ўйнашини хоҳламаган эдим. Буни шунақа қилиб ўтказишди. Тоҳир Маликни ҳам ўртага қўшиб, охири Тоҳир ака ‘бўлади-ку, яхши-ку’, деганига бадиий раҳбар сифатида майли деганман.

Кейин бахтимга Раъно Шодиева чиқди. Мен унга айтганман, ‘мана шу ролни ўйнайсан, кейин сен Раъно Шодиева бўласан. Халққа таниласан, унвонлар ҳам оласан’, деганман. Бу гап уни эсидами, йўқми, билмадим. Лекин Раъно унақа эмас, у билади. Алмашгани ҳам яхши бўлган, чунки сериалнинг кейинги қисмларини Наврўза тортолмасди. Актриса сифатида, чунки у актриса эмас эди. Буни Раъно тортиб кетди, ҳаттоки ўша битта эпизодида, ҳалиги, Кесак полвон билан ‘Отам нима касал’ деган эпизодининг ўзида ҳолатга кириб, кўзидан ёшлар оқиб кетган. Биз учун у яхшилик эди. Биз баҳо сифатида қарайдиган бўлсак, тўртни бешга алмаштирдик. Наврўза ҳам ўзининг роли бўйича эплаб чиқиб кетган. Ўзининг сокинлиги билан, Жаҳонгир Қосимовнинг, бизнинг айтган гапларимиз билан. Лекин буёғини эплаши учун катта маҳорат керак эди.

Ёдгор Саъдиев, Ўзбекистон ва Қорақалпоғистон халқ артисти