Бош прокуратура ҳузуридаги Департаментнинг Навоий вилоят бошқармаси томонидан давлат инвестиция дастурига киритилган объэктларда бюджет маблағларининг мақсадли сарфланишини ўрганиш юзасидан ўтказилган терговга қадар текширувда «Ягона буюртмачи хизмати» корхонаси ва «К.о.» МЧЖ мансабдор шахслари Навоий педагогика институти ётоқхонасини жиҳозлаш тўғрисидаги ҳужжатларга сохта маълумотлар киритгани аниқланди. Бу ҳақда Бош прокуратура матбуот котиби Ҳаёт Шамсутдинов маълум қилди.
Улар ҳақиқий баҳоси 556,1 миллион сўм бўлган 31 турдаги жиҳоз ва мебеллар тўпламларининг нархларини 2,3 миллиард сўмга ошириб кўрсатиш орқали 1,7 миллиард сўм бюджет маблағларини ўзлаштириш йўли билан талон-торож қилгани маълум бўлди.
Мазкур ҳолат юзасидан «Ягона буюртмачи хизмати» ва «К.о.» МЧЖ мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)