2019 йилнинг 7 сентябрь кунида Йўл ҳаракати хавфсизлиги бошқармаси томонидан синов тариқасида янгиликлар жорий қилиш амалиёти бошланган эди, деб ёзмоқда ИИББ матбуот хизмати. Йўл-транспорт ҳодисаларининг олдини олиш мақсадида пойтахтнинг бир нечта чорраҳаларида светофорнинг ишлаш тартиби ўзгартирилган.
Ўзгаришларга кўра, йўналишлардан бирида светофорнинг тақиқловчи (қизил) сигналидан сўнг, (сариқни четлаб) рухсат берувчи (яшил) сигнал ёнмоқда. Шу вақтда қарама қарши йўналишда светофор стандарт тартибда (қизил, сариқ, яшил) ишлайди.
Синов шаҳарнинг тўртта чорраҳаларида бошланди: Амир Темур – Нукус кўчалари; Шароф Рашидов – Ислом Каримов кўчалари, Афросиёб – Шаҳрисабз кўчалари; Содиқ Азимов – Фидокор кўчалари.
«Ижобий натижаларни узоқ кутишга тўғри келмади, юқоридаги чорраҳаларда кичик тўқнашувлар сони камайди. Бундан ташқари, ушбу ўзгариш йўналишлардан бирига иккинчи йўналиш ҳаракатни бошлашидан олдин бурилишларни тугатиш учун фурсат беради ва бу билан чорраҳалардаги тирбандликнинг олди олинади», — дейилади хабарда.
Натижалар ижобий бўлганлиги сабабли ушбу янги тартиб тўлиқ ишга туширилган. Масалан, фақатгина Учтепа туманида ўзгаришлар ўндан ортиқ чорраҳаларда, Чилонзор туманида – бешта, Сергели туманида ҳам бешта чорраҳаларда ишга туширилган.
Таъкидланишича, ҳайдовчилар аста-секин светофорнинг янги тартибига кўникмоқда, ЙПХ ходимларининг кузатувларига кўра, улар рухсат берувчи сигналга илгаригидан кўра секинроқ қўзғалишни бошлаган.
Изоҳ (0)