2019-yilning 7-sentabr kunida Yo‘l harakati xavfsizligi boshqarmasi tomonidan sinov tariqasida yangiliklar joriy qilish amaliyoti boshlangan edi, deb yozmoqda IIBB matbuot xizmati. Yo‘l-transport hodisalarining oldini olish maqsadida poytaxtning bir nechta chorrahalarida svetoforning ishlash tartibi o‘zgartirilgan.
O‘zgarishlarga ko‘ra, yo‘nalishlardan birida svetoforning taqiqlovchi (qizil) signalidan so‘ng, (sariqni chetlab) ruxsat beruvchi (yashil) signal yonmoqda. Shu vaqtda qarama qarshi yo‘nalishda svetofor standart tartibda (qizil, sariq, yashil) ishlaydi.
Sinov shaharning to‘rtta chorrahalarida boshlandi: Amir Temur – Nukus ko‘chalari; Sharof Rashidov – Islom Karimov ko‘chalari, Afrosiyob – Shahrisabz ko‘chalari; Sodiq Azimov – Fidokor ko‘chalari.
“Ijobiy natijalarni uzoq kutishga to‘g‘ri kelmadi, yuqoridagi chorrahalarda kichik to‘qnashuvlar soni kamaydi. Bundan tashqari, ushbu o‘zgarish yo‘nalishlardan biriga ikkinchi yo‘nalish harakatni boshlashidan oldin burilishlarni tugatish uchun fursat beradi va bu bilan chorrahalardagi tirbandlikning oldi olinadi”, — deyiladi xabarda.
Natijalar ijobiy bo‘lganligi sababli ushbu yangi tartib to‘liq ishga tushirilgan. Masalan, faqatgina Uchtepa tumanida o‘zgarishlar o‘ndan ortiq chorrahalarda, Chilonzor tumanida – beshta, Sergeli tumanida ham beshta chorrahalarda ishga tushirilgan.
Ta’kidlanishicha, haydovchilar asta-sekin svetoforning yangi tartibiga ko‘nikmoqda, YPX xodimlarining kuzatuvlariga ko‘ra, ular ruxsat beruvchi signalga ilgarigidan ko‘ra sekinroq qo‘zg‘alishni boshlagan.
Izoh (0)