15 минг йиллик тарихга эга муз таркибидан фанга номаълум 28 та вирус топилди. Олимлар намуналарнинг бактерияларини хато билан зарарлантириб қўйишни олдини олиш учун ўзига хос услубда текширувлар ўтказди. Бу ҳақда Live Science хабар берди.
Дунёдаги энг қадимги музлардан бирининг намуналари 2015 йилда Хитой ва АҚШ олимлари томонидан олинган. Уларни олиш учун Тибетдаги музни 50 метр чуқурликда пармалашга тўғри келган.
Намуналарнинг устки қисми пармалаш ва музни олиб келиш вақтида бактериялар билан зарарлангани туфайли тадқиқотчилар намуналарнинг ички қисмини ўрганди. Бунинг учун намуналарни Цельсий бўйича 5 даража совуқ ҳароратдаги хонага жойлаштирилди ва уларнинг ички қатламидан ярим сантиметрли бўлак олиш учун стерилланган тасмасимон аррадан фойдаланилди.
Шундан кейин қолган муз этанол билан ювилди ва ҳар бир томонидан 0,5 сантиметрдан эритилди. Якунда олинган намуналар стерилланган сув билан ювилди. Шу тариқа олимлар бошқа бактерия ва вируслар билан зарарланмаган муз қатламларини ўрганишга муваффақ бўлди.
Тадқиқотчилар иқлим ўзгаришлари бутун дунёда музлар эришига олиб келаётгани, жумладан, Тибетда ҳам ушбу ҳодиса кузатилаётгани, шу сабабли қадимги вирусларнинг намуналари кейинчалик йўқолиб кетиши мумкинлигини билдирган. Бундан ташқари, номаълум касаллик қўзғатувчилар атроф-муҳитга тарқалса, одамлар ҳаёти хавф остида қолиши мумкинлиги маълум қилинган.
Изоҳ (0)