LVMH концерни эгаси Бернар Арно Forbes версиясига кўра, дунёдаги энг бадавлат кишилар рўйхатининг биринчи поғонасидан тушиб кетди, деб хабар беради журнал.
Рўйхат бошидан 17 январь куни етакчиликни қўлдан бой берган Amazon асосчиси Жефф Безос яна ўрин олган. 21 январь ҳолатига кўра, Безоснинг бойлиги 489 миллион долларга ошиб, 116,1 миллиард долларга етган. Ўз навбатида Арнонинг бойлиги эса 3,7 миллиардга камайиб, 112,9 миллиард долларни ташкил этган.
Арнонинг Forbes рўйхатида биринчиликни қўлдан бой беришига Хитойда тарқалган янги вирус туфайли LVMH акцияларининг тушиб кетиши сабаб бўлган. Таҳлилчиларнинг тахминига кўра, у асосан Хитой Янги йили олдидан талаб юқори бўладиган қиммат товарлар савдосига ҳам таъсир кўрсатади.
Эслатиб ўтамиз, Хитойда янги типдаги коронавирусдан касалланиб вафот этганлар сони тўққиз кишига етди. Сўнгги маълумотларга кўра, 440 кишида мазкур вирус аниқланган.
Касалликка чалиниш ҳолатлари Таиланд ва Японияда ҳам кузатилган. Ўзбекистон ТИВ Хитойда тарқалган янги вирус сабабли у ерга бормоқчи бўлган ўзбекистонликларни эҳтиёт бўлишга чақирган. Ўзбекистон ССВ Хитойда тарқалган коронавирус туфайли чегарадаги санитар назорат кучайтирилганини маълум қилган.
Изоҳ (0)