LVMH konserni egasi Bernar Arno Forbes versiyasiga ko‘ra, dunyodagi eng badavlat kishilar ro‘yxatining birinchi pog‘onasidan tushib ketdi, deb xabar beradi jurnal.
Ro‘yxat boshidan 17-yanvar kuni yetakchilikni qo‘ldan boy bergan Amazon asoschisi Jeff Bezos yana o‘rin olgan. 21-yanvar holatiga ko‘ra, Bezosning boyligi 489 million dollarga oshib, 116,1 milliard dollarga yetgan. O‘z navbatida Arnoning boyligi esa 3,7 milliardga kamayib, 112,9 milliard dollarni tashkil etgan.
Arnoning Forbes ro‘yxatida birinchilikni qo‘ldan boy berishiga Xitoyda tarqalgan yangi virus tufayli LVMH aksiyalarining tushib ketishi sabab bo‘lgan. Tahlilchilarning taxminiga ko‘ra, u asosan Xitoy Yangi yili oldidan talab yuqori bo‘ladigan qimmat tovarlar savdosiga ham ta’sir ko‘rsatadi.
Eslatib o‘tamiz, Xitoyda yangi tipdagi koronavirusdan kasallanib vafot etganlar soni to‘qqiz kishiga yetdi. So‘nggi ma’lumotlarga ko‘ra, 440 kishida mazkur virus aniqlangan.
Kasallikka chalinish holatlari Tailand va Yaponiyada ham kuzatilgan. O‘zbekiston TIV Xitoyda tarqalgan yangi virus sababli u yerga bormoqchi bo‘lgan o‘zbekistonliklarni ehtiyot bo‘lishga chaqirgan. O‘zbekiston SSV Xitoyda tarqalgan koronavirus tufayli chegaradagi sanitar nazorat kuchaytirilganini ma’lum qilgan.
Izoh (0)