22 январь, чоршанба куни Тошкент шаҳар ҳокимлигида ўтказилган матбуот анжуманида пойтахт ҳокими ўринбосари Элбек Шукуров иштирок этди ва амалга оширилган ишлар юзасидан, хусусан, ёшлар туризми йўналишида қилинадиган ишлар ҳақида маълумот берди.
Ҳоким ўринбосари сўнгги бир йил ичида шаҳарда тунги ҳаёт ўзгаргани, очиқ майдонларда маданий тадбирларнинг ўтказилаётгани, шаҳар секин-асталик билан мегаполисга айланиб бораётганини қайд этган.
«Тошкент шаҳрига тунги клублар керак. Шу қаторда бир жиҳатга аҳамият беришингизни хоҳлардим: агар хавфсизлик тўлиқ таъминланса, тунги клублар фаолиятига тўсиқлар қўйилмайди. Аслида, бунинг зарарли томони йўқ. Одамлар кўчага чиқади, харажат қилади. Бу эса ўз навбатида, ички ва ташқи туризм ривожига ҳам ўз ҳиссасини қўшади. Клублар қонуний талабларни бажарадиган бўлса, уларга нисбатан ҳеч қандай чекловлар қўйилмайди», — деган Элбек Шукуров.
Шунингдек, Шукуров шаҳарнинг тунги манзараси олдингидан анча ўзгарганини ҳам қўшимча қилди. Жумладан, «Тошкент сизни севади», «Ёшлар картинг», «Тунги велосайр», «MuzzDay», «Гуллар фестивали», «Landshaft open» каби маданий тадбирлар бренди яратилгани алоҳида қайд этди.
Изоҳ (0)