«Дарё»да косонлик фуқаро укаларини қизининг номусига тегишда ва ўғлини ўлдиришга ҳаракат қилишда айблагани ҳақида мақола эълон қилинганди. Қашқадарё вилоят прокуратурасининг маълумот беришича, фуқаро Ҳусниддин Мирзаев туман ҳокими қарорини олиш учун интернетда шов-шув қилишга уринганини тан олган. Бу ҳақда вилоят ИИБ ва прокуратура ҳамкорлигида ташкил этилган матбуот брифингида маълумот берилди, дея хабар беради «Дарё» мухбири.
Косонлик Ҳусниддин Мирзаевнинг муаммолари ҳақида ижтимоий тармоқларда видео эълон қилингач, вилоят прокуратураси мурожаатни ўрганишга киришган.
— Вазиятни ўрганганимизда муаммо ака-укалар ўртасидаги келишмовчилик экани маълум бўлди, — дейди вилоят прокуратураси ходими Шоҳрух Ҳақбердиев. — Энг ёмони, фуқаро буғдойимни олиб қўйишди дейиш билан бирга, уйи йўқлигини, уй қуриш учун мўлжаллаган ер-участкасини ака-укалари тортиб олганини айтган. Ҳолат ўрганилганда фуқарога 1999 йил ер-участкаси ажратилгани, бу ҳақда туман ҳокими қарори ҳам чиққани маълум бўлган. Аммо фуқаро шунча йил ўтса-да, қурилиш ишларини бажармаган.
Ҳусниддин Мирзаев прокуратура ходимларига унга уй қуриш учун берилган ер-участкаси ҳақидаги туман ҳокими қарорини олиш учун блогерлар ёрдамида интернетда шов-шув қилганини тан олган.
— Фуқаро унга ер ажратилгани ҳақидаги туман ҳокими қарорини олиш учун интернетда ваҳима қилганини тан олди, — дейди Шоҳрух Ҳақбердиев.
Матбуот брифингида таъкидланишича, фуқаро ака-укалари билан ярашиб олган.
— Ҳусниддин Мирзаевнинг «14 тонна буғдойимни «участкавой» тортиб олди», деган гапини ҳам текшириб кўрдик, — дейди Шоҳрух Ҳақбердиев. — Гап асоссиз бўлиб чиқди. Ўша ерга эгалик қилган фермернинг айтишича, режа бўйича давлатга 35 тонна ғалла топширилган. Режадан ортган 9 тонна ғалла эса Ҳусниддин Мирзаевнинг укаларига иш ҳақи сифатида бўлиб берилган.
Таъкидланишича, Ҳусниддин Мирзаевнинг «укаларим тракторимни сотиб юборди», деган гапи ҳам ўз исботини топмаган.
— Сотилгани айтилган тракторни ҳам бориб кўрдик, — дейди прокуратура ходими. — Маълум бўлишича, трактор сотилмаган. Қолаверса, трактор Ҳусниддин Мирзаевники эмас, балки акасиники бўлиб чиқди.
Матбуот брифингида маълум қилинишича, фуқаро Ҳусниддин Мирзаев «Дарё»да эълон қилинган мақола унга маъқул келмагани боис, мухбир устидан туман прокуратурасига шикоят қилган.
Изоҳ (0)