Олий ўқув юртлари педагог ходимлари учун бир йиллик меҳнат шартномалари жорий этилиши мумкин

2020 йилда таълим соҳасида амалга оширилиши зарур бўлган долзарб масалалар, белгиланган мақсадли кўрсаткичлар ва ислоҳотларни жадаллаштириш бўйича режалаштирилган ишларнинг «йўл харитаси» тасдиқланган эди.

«Kun.uz»нинг ёзишича, «Йўл харитаси»да амалга ошириш белгиланган асосий масалалар ичида педагогларни тайёрлаш, қайта тайёрлаш ва уларнинг малакасини ошириш тизимини такомиллаштириш чора-тадбирлари ҳам ўрин олган.

Халқ таълими тизимидаги педагог ходимларнинг касбий маҳорати ҳамда ўз фанидан билим ва кўникмаларини узлуксиз ривожлантириб бориш мақсадида босқичма-босқич халқаро ташкилотлар билан ҳамкорликда касбий сертификация (лицензия) тизимини жорий қилиш ва юқори малака тоифасига эга ўқитувчилар ойлик иш ҳақларини ошириб бориш тизимига ўтиш мўлжалланган.

Педагогик таълим соҳасини янада ривожлантириш, хусусан, ёшлар селекциясини кучайтириш, тегишли йўналишлар бўйича таълим муддатини оптималлаштириш, педагогика олий таълим тармоғини кенгайтиришга қаратилган тегишли чора-тадбирларни белгилаш ҳам назарда тутилган.

Бунда «Мусиқа таълими», «Жисмоний маданият», «Технологик таълим», «Чақириққача ҳарбий таълим», «Тасвирий санъат ва муҳандислик графикаси», «Миллий ғоя, маънавият асослари ва ҳуқуқ таълими», «География ўқитиш методикаси» йўналишлари бўйича таълим муддатларини қайта кўриб чиқиш таклиф қилинмоқда.

Олий таълим муассасаларига педагог-ходимларни ишга қабул қилиш тартиби такомиллаштирилади.

Олий таълим муассасаларига педагог ходимларни танлов асосида ишга қабул қилиш тартибини такомиллаштириш юзасидан қуйидагиларни назарда тутувчи ҳукумат қарори лойиҳасини ишлаб чиқиш назарда тутилмоқда:

• вакант педагогик лавозимлар ҳақида Олий ва ўрта махсус таълим вазирлиги веб-сайтининг махсус саҳифасида марказлашган ҳолда эълонлар бериб бориш тизимига ўтиш;
• педагог ходимларни танлов асосида ишга қабул қилиш жараёнини соддалаштириш;
• педагог ходимлар лавозими учун белгиланган беш йиллик муддатни қайта кўриб чиқиш ҳамда бир йиллик меҳнат шартномаларини жорий этиш.

Бунда мактаб таълимининг реал эҳтиёжидан келиб чиқиб, истиқболда кадрлар тайёрлаш режаси ишлаб чиқилади.