Тошкент давлат юридик университети 2020/2021-ўқув йилидан бошлаб бир қанча янги йўналишлар бўйича абитуриентлар қабул қилишни режалаштирмоқда. Бу ҳақда 16 январь куни АОКАда ўтказилган матбуот анжуманида Адлия вазири ўринбосари, Тошкент давлат юридик университети ректори Раҳимжон Ҳакимов маълум қилди.
«Ўзини ўзи молиялаштириш тизимига ўтганимиздан сўнг васийлик кенгаши билан биргаликда бугунги замон талабларидан келиб чиқиб янги йўналишлар бўйича бакалавр ва магистратура босқичларини очиш бўйича музокаралар олиб боряпмиз. Оддий мисол, ҳозир бизда магистратурада адвокатура йўналиши йўқ. Лекин адвокатлар палатасидан адвокатура йўналиши очиш юзасидан жуда катта талаб келиб тушяпти. Адвокатурани чуқурроқ ўргатиш, бу соҳада илмий тадқиқотларни кучайтириш мақсадида янги ўқув йилидан алоҳида адвокатура йўналишини очамиз. Бундан ташқари, юртимизда халқаро арбитраж соҳаси мутахассисларига ҳам талаб катта. Бу йўналиш бўйича ҳам чет эл профессор-ўқитувчиларини жалб қилган ҳолда магистрларни тайёрлашни кўзда тутмоқдамиз. Буларнинг барчаси амалиёт талабларидан келиб чиқади. Ўзини ўзи молиялаштиришга ўтиш реал ҳаётга, бозор талабларига мослаштиришга олиб келади», — деди Ҳакимов.
Матбуот анжуманидан сўнг «Дарё» мухбири Миролим Исажоновга қисқа интервью берган Тошкент давлат юридик университети ректори бакалавр босқичида ҳам янги йўналиш очиш кўзда тутилаётганини қайд этди.
«Биз халқаро рейтингларга чиқишни олдимизга мақсад қилганмиз. Бу 2030 йилгача олий таълимни ривожлантириш концепциясида ҳам белгиланган. Бунинг учун таълим йўналишлари кўп бўлиши керак. Тошкент давлат юридик университетида фақат ҳуқуқшуносларни тайёрлаймиз. Битта йўналиш билан халқаро рейтингга чиқиш жуда қийин. Шунинг учун бир қанча янги таълим йўналишлари очишни режалаштиряпмиз. Ҳозир Ўзбекистонда давлат бошқаруви йўналиши бўйича бакалавр мутахассислари тайёрлайдиган олий таълим муассасаси йўқ. Бу чет давлатларда жуда ривожланган. Биз мана шу йўналишда бакалавр босқичини очишни ният қилганмиз. Айни пайтда бу борада ўрганиш ишларини олиб бормоқдамиз. Бунинг учун зарур кадрлар захирасини шакллантириб, тегишли дарсликлар тайёрлай олсак, албатта, янги ўқув йилидан давлат бошқаруви йўналишини очмоқчимиз», — деди Раҳимжон Ҳакимов.
Изоҳ (0)