Давлат хавфсизлик хизмати Самарқанд вилояти бошқармаси ва вилоят ИИБ тезкор хизмат ходимлари томонидан олиб борилган тезкор тадбир давомида Оқдарё туманидаги «Маҳалла» қишлоғидаги 14 сотих ер майдонининг 3,5 сотихида «Хўрозлар жанги» мусобақаси учун ташкил қилинган арена фаолиятига чек қўйилганлиги ҳақида хабар берилган эди.
Жиноят ишлари бўйича Оқдарё туман суди раиси Илёс Дониёровнинг «Дарё»га маълум қилишича, мазкур арена эгаси 1982 йилда Оқдарё тумани «Маҳалла» қишлоғида туғилган С.Б.га нисбатан қамоқ эҳтиёт чораси қўлланилган.
Ўзбекистон Республикаси Жиноят кодексининг 278-моддаси 1-қисми билан айбланувчи С.Б.га нисбатан қамоққа олиш тарзидаги эҳтиёт чорасини қўллаш ҳақида туман прокурори томонидан илтимоснома тақдим этилган.Маълум қилинишича, айбланувчи С.Б. 2020 йил 11 январь куни соат 15:00 да ўзи яшаб келаётган уй-жойида қонунга хилоф равишда қимор ва таваккалчиликка асосланган хўроз уруштириш ўйинини ташкил қилган. Ушбу ўйин учун жой ажратиб, шароит яратиб, хўроз уруштириш ўйинига келган ҳар бир фуқародан кириш учун 8000 сўмдан пул олган.
Хабар берилишича, С.Б. ўйинга тикилган пуллардан маълум миқдорда ўзининг улушини олиб, бевосита ўйин ўтказаётганлиги, Самарқанд вилоят ДХХ ва Самарқанд вилоят ИИБ ҳамда Оқдарё туман ИИБ ходимлари томонидан ўтказилган тезкор тадбир давомида аниқланган. Ўйинга келган фуқаролардан ўйин учун олинган 10 дона 10 000 сўмлик, 34 дона 5000 сўмлик, 31 дона 1000 сўмлик купюралардаги жами 301 000 сўм миқдоридаги пул холислар иштирокида ашёвий далил тариқасида ҳужжатлаштириб олинган.
Суд туман прокурори вазифасини бажарувчи Д.Музаффаровнинг маърузасини, ҳимоячи фикрларини эшитиб, айбланувчи айбланаётган жиноий ҳаракати Жиноят кодексининг 15-моддасида назарда тутилган оғир жиноят туркумига киришини, унинг дастлабки тергов ва суддан бўйин товлашини, иш бўйича ҳақиқатни аниқлашга халал бериши мумкин бўлган уринишларига йўл қўймаслик мақсадида унга нисбатан қамоққа олиш тарзидаги эҳтиёт чорасини қўллашни лозим топган.
Изоҳ (0)