Аввалроқ ижтимоий тармоқларда ЙПХ ходими оломон қуршовида қолиб кетгани акс этган видеоёзув тарқалди. Видеохабарда воқеа Қашқадарёнинг Чироқчи туманида бўлгани, ЙПХ ходими маст экани, одамлар унинг жазоланишини талаб қилаётгани билдирилган. ИИВ Йўл ҳаракати хавфсизлиги бош бошқармасининг «Дарё»га маълум қилишича, ЙПХ инспекторига нисбатан хизмат текшируви бошланган.
Қашқадарё вилояти Чироқчи тумани прокуратураси томонидан «2020 йил 11 январь куни Ш.Нуримов ва бошқаларнинг ҳаракатларида жамиятда юриш-туриш қоидаларини қасддан менсимасдан, ҳокимият вакилига қаршилик кўрсатиш орқали оммавий тартибсизликлар ташкил қилиш ва фаол қатнашиш, ғаразгўйлик ёки бошқа паст ниятларда туҳмат қилиш каби ижтимоий хавфли қилмишлар аломатлари мавжудлиги сабабли мазкур ҳолат юзасидан» 17 январь куни Жиноят кодексининг 139-моддаси («Туҳмат») 3-қисми «г» банди ва 277-моддаси («Безорилик») 2-қисми «б» банди билан жиноят иши қўзғатилди.
Қашқадарё вилояти ИИБ ЙҲХБ ЙПХ катта инспектори, катта сержант Н.Ярматовга нисбатан хизмат текшируви олиб борилмоқда.
Эслатиб ўтамиз, Қашқадарё вилояти ИИБ ЙҲХБ ЙПХБ 2-ЙПХ отряди 2-сафарбарлик гуруҳи ЙПХ катта инспектори катта сержант Н.Ярматов «Микрокредитбанк» биноси рўпарасида ўрнатилган 3.27 («Тўхташ тақиқланган») йўл белгисига амал қилмай тўхтаб турган Labo ҳайдовчиси Ш.Нуримовга нисбатан маъмурий баённома тузиб (ҳайдовчининг олдида ҳужжатлари бўлмаган), машинани жарима майдончасига жойлаштиришга қарор қилган. Катта сержант Ярматов қоидабузар ҳайдовчининг Labo’сини жарима майдончасига олиб кетиш олдидан ўзининг 878 рақамли Spark’ини, мажбурий тўхташ чироқларини ёқиб, «Микрокредитбанк» рўпарасидаги 3.27 йўл белгисининг таъсир доирасида қолдириб кетган. У жарима майдончасидан қайтиб келгач, Labo’нинг эгаси ЙПХ инспекторидан ўзига ўзи маъмурий баённома расмийлаштиришни талаб қилган.
Таъкидланишича, ушбу ҳолат юзасидан қўшимча маълумот берилади.
Изоҳ (0)