Куни кеча Telegram’даги «Давлетовуз» канали Ўзбекистонда «Электр энергияси тақчиллиги муаммосини ҳал қилса бўладими?» номли мақоласи орқали электр энергияси таъминотида тез-тез кузатилаётган узилишларга барҳам беришда Грузия тажрибасидан фойдаланишни таклиф этган эди.
Бугун, 18 январь куни Тошкент халқаро Вестминстер университетида «Ўзбекистонда энергетика соҳасини ривожлантириш истиқболлари» мавзусида ўтказилган очиқ мулоқотдан кейин Энергетика вазири ўринбосари Шерзод Хўжаев мазкур таклиф борасида ўз муносабатини билдирди, дея хабар бермоқда «Дарё» мухбири Миролим Исажонов.
Таклифга муносабатим ижобий. Лекин биз фақат Грузия тажрибага таянишимиз нотўғри бўлади. Грузия тажрибасини бизнинг мамлакатимизга нисбатан қўлланилишини тўғри ёки нотўғрилигини айтишимиз учун аввал биз борадиган йўналишимизни белгилаб олишимиз керак. Яъни қайси бозор моделига ўтамиз. Шунга қарамасдан Грузияда энг катта ислоҳотларни ўтказиш даврида энергетика вазирининг ўринбосари бўлган ходим ҳозирги кунда менинг жамоамда ишлаяпти. Осиё тараққиёт банки томонидан ёлланган эксперт сифатида улар айни мана шу кеча-кундузда Тошкентда. Биргаликда бозор моделини ишлаб чиқиш борасида ишлаяпмиз.Аввалроқ Энергетика вазирлиги республикада электр ва газ таъминотини яхшилаш учун қилинаётган ишлар ҳақида маълумот берганди.Агар биз Грузия тажрибасига таянган ҳолда ишлаб чиққан бозор моделимиз ҳукумат томонидан маъқулланса, биз шу йўналиш бўйича кетамиз. Бундан ташқари, Америка, Буюк Британия, Туркия ва бошқа мамлакатлардан ҳам экспертларни Жаҳон банки, ОТБ ва Европа тикланиш ва тараққиёт банки бизга ёллаб берган. Улар билан ҳам ишлаяпмиз. Қайси моделни танлаймиз, буни вақт кўрсатади.
Унутмаслигимиз керак, Грузияда аҳоли сони биздан деярли 10 баробар кам. Ишлаб чиқариш бўйича салоҳияти ҳам деярли 10 баробар кам. Энергетика структураси ҳам умуман бошқача. Грузия ҳам қандайдир ўзига хос оргинал бир модел танламаган. Улар ҳам бошқа мамлакатлар тажрибасидан келиб чиққан. Бутун дунёда 3-4 та модел ишлайди, бошқа модел йўқ.
Шерзод Хўжаев, Энергетика вазири ўринбосари
Эслатиб ўтамиз, Ўзбекистон Президентининг 2019 йил 1 февралдаги қарорига мувофиқ Ўзбекистон Республикаси Энергетика вазирлиги ташкил этилган эди. Ўша йилнинг 27 мартидаги Президент қарорига асосан «Ўзбекэнерго» акциядорлик жамияти ислоҳ қилиниб, унинг негизида «Иссиқлик электр станциялари», «Ўзбекистон миллий электр тармоқлари» ва «Ҳудудий электр тармоқлари» акциядорлик жамиятлари ташкил топди.
Изоҳ (0)