Ижтимоий тармоқларда кекса аёлнинг мурожаати тарқалди. Видеомурожаатда Тошкент шаҳри Яшнобод туманида яшовчи аёл ўзи ва қизи қийин аҳволга тушиб қолгани туфайли уйни тозала олмаётгани ҳақида айтади.
Тошкент шаҳар ИИББ матбуот хизматининг хабар беришича, ушбу видеоролик Яшнобод тумани ИИО ФМБ ходимлари томонидан ўрганилиб, ҳокимлик, маҳаллий фуқароларнинг ўзини ўзи бошқариш органлари вакиллари ҳамда ҳудудий туман тиббиёт бирлашмаси ходимлари билан биргаликда текширилди.
Маълум бўлишича, Яшнобод туманидаги «Наврўзобод» маҳалласида яшовчи 80 ёшли Марина Х. ва унинг қизи 53 ёшли Светлана Н. даволаш муассасасида рўйхатга олинган. Оиладаги асосий даромад Марина Х. нинг пенсияси бўлиб, уларнинг аксарияти зарур дори-дармонларни сотиб олишга сарфланади ва озиқ-овқат ва коммунал хизматлар учун пуллари деярли йўқ.
Яшнобод тумани ИИО ФМБ ходимлари аёлларнинг ижтимоий-маиший муаммоларини ўрганиб, оилага ёрдам беришга қарор қилди. Уй тартибга келтирилди, озиқ-овқат сотиб олиниб, овқат тайёрланди.
Шунингдек, аёллар масалалари бўйича инспекторлар келиб, уларга уй шароитида ёрдам берадиган жадвални тузиш тўғрисида қарор қабул қилинди.
Бундан ташқари, аёлларга бепул тиббий ёрдам олиш учун йўлланма олишга амалий ёрдам берилди.
Изоҳ (0)