«Уйларни энди фақат адирларга қурамиз». Андижон ҳокими «Муҳташам юз йил» сериалидаги вазиятни намуна қилиб кўрсатди

Андижон вилояти Ўзбекистонда аҳолиси энг зич ҳудуд бўлгани боис, энди турар жой бинолари фақат адирларга қурилади; экин майдонлари қурилиш мақсадлари учун ажратилмайди. Бу ҳақда вилоят ҳокими Шуҳратбек Абдураҳмонов маълум қилди, дея хабар бермоқда Мусулмонбек Иброҳимов.

Андижон вилояти Ўзбекистон ҳудудининг 1 фоизини ташкил этгани ҳолда, бу ерда мамлакат аҳолисининг 10 фоизи истиқомат қилади. Вилоят ҳудуди Бухороникидан 9,5 баробар, Фарғонаникидан икки баробар, Навоийникидан эса 25 баробар кичик.

Энди Андижонда экин ерларига, пахта, ғалла майдонларида уй-жой қурилмайди, бундай ерлар ҳеч нарсага берилмайди. Бу менинг эмас, Президентнинг топшириғи. Агар биз бугун пахта, нон, дон экаётган ерларни бериб юбораверсак, 15 йилдан сўнг нима билан қорин тўйғазамиз, нима билан тирикчилик қиламиз?

Туркларнинг «Муҳташам юз йил» сериалини кўрган бўлсангиз, одамлар уйларини адирларга, тоғларга қурган. Нима учун? Чунки ер йўқ. Бундан буёғига биз ҳам Андижонда фақат ва фақат мана шундай адир ичига кириб бораверамиз, бошқа йўл йўқ. Туманларда экин экилмайдиган ер фақат Асака ва Қўрғонтепада чиқди.

Бошқа туманларда бундай ер топилмагани боис, биз бутун вилоятнинг қурилишини — ҳамма кўп қаватли уйларни мана шу ерга олиб келяпмиз. Иккинчи масала — мабодо «уй қуриб, сотаман» деган тадбиркорлар келса, ер, кредит олишда ёрдам кўрсатамиз. Марҳамат, қурсин. Хонадонларни ипотека кредити асосида одамларга сотсин.

Шуҳратбек Абдураҳмонов, Андижон вилоят ҳокими