Тожикистоннинг Истаравшон шаҳрида ўзбекистонлик хонанда Юлдуз Усмонованинг сохта концертини ташкил қилган шахслардан бирига нисбатан жиноий иш қўзғатилган. Бу ҳақда Asia-Plus хабар берди.
Маълум қилинишича, 43 ёшли Саиджон Ғаниев Тожикистон Жиноят кодексининг 247-моддаси 2-қисми (олдиндан келишган ҳолда бир гуруҳ шахс томонидан содир этилган фирибгарлик) билан айбланмоқда. Унга нисбатан концерт ташкил қилиш ва алдов йўли билан одамлардан 7000 соминийни (722 доллар) ўзлаштириш айби қўйилган. Агар Ғаниевнинг айби судда исботланса, у 52 минг сомоний (5360 доллар) миқдорида жарима тўлаши ёки беш йилгача қамоқ жазосига ҳукм қилиниши мумкин.
Хабар берилишича, мамлакатнинг ҳуқуқни муҳофаза қилувчи идоралари концерт ташкилотчиларининг яна бирига нисбатан жиноий иш қўзғатиш масаласини кўриб чиқмоқда.Юлдуз Усмонова иштирок этиши керак бўлган концерт 2019 йилнинг 25 декабрь куни Истаравшан шаҳридаги «Садбарг» ресторанида бўлиб ўтган. Концерт учун ҳар бири 350 сомонийдан (36 доллар) бўлган 300 дан ортиқ чипта сотилган. Ташкилотчилар чипталар сотувидан 110 минг сомоний (11,3 минг доллар) ишлаб олган.
Концерт бошланган вақт саҳнага кўзойнак таққан аёл чиқиб, қўшиқ айта бошлаган. Бироқ мухлислар унинг ҳақиқий Юлдуз Усмонова эмаслигини пайқаган. Концерт вақтида ҳақиқий хонанда ўзининг Instagram’ида тўғридан-тўғри эфир қилганида уларнинг шубҳаси янада ортган.
Изоҳ (0)