Қозоғистоннинг Ақтўбе вилоятида 53 нафар Ўзбекистон фуқаролари бўлган Самара—Чимкент йўналиши бўйлаб ҳаракатланаётган Сетра автобуси техник носозлик туфайли тўхтаб қолди, деб хабар бермоқда Tengrinews «Мой город» порталига таяниб.
Қайд этилишича, воқеа Ақтўбе вилоятининг Хромтау тумани Дон қишлоғи яқинида юз берган. Ҳодиса жойига Хромтау тумани Фавқулодда вазиятлар хизмати ходимлари етиб келган ва йўловчиларга «Аманат» лагерига эвакуация қилишни таклиф қилган, лекин улар буни рад этган. Шундан сўнг автобус таъмирлаш ишлари тугагунча йўловчилар кутиб туришлари учун ҳодиса жойига иситилган автобус юборишга қарор қилинган.
ТИВ матбуот хизматининг хабар беришича, Ўзбекистоннинг Ақтау шаҳридаги Бош консулхонаси ҳам содир бўлган воқеани тасдиқлади. Унда айтилишича, воқеа 12 январь куни юз берган. Вилоят Фавқулодда вазиятлар департаменти ходимларининг йўловчиларга ўз вақтида ёрдам кўрсатган ва улар яқин орадаги кемпингга вақтинча жойлаштирилган. Тиббий ёрдамга эҳтиёж бўлмаган.
13 январь куни маҳаллий вақт билан соат 11:00 да автобус таъмирлаш ишлари якунлангач, автобус ўз йўналиши бўйича ҳаракатланишда давом этган.
Ақтўбеда бундай ҳодиса биринчи марта содир бўлиши эмас. 2019 йилнинг декабрь ойида Ақтўбеда ҳудди шу йўналиш бўйлаб ҳаракатланаётган ва ичида 50 нафар Ўзбекистон фуқароси бўлган автобус Айтекеби тумани ҳудудида техник носозлик туфайли тўхтаб қолган эди. Туман йўл-патрул хизмати йўловчиларни эвакуация қилиш, уларни иссиқ овқат билан таъминлаш ва автобусни таъмирлашда ёрдам кўрсатган. Автобус таъмирдан кейин ҳаракатни давом эттирган.
2018 йилнинг ноябрь ойида ҳам Ақтўбедаги Самара — Чимкент йўлида ўзбекистонликларни олиб кетаётган автобус бузилиб қолган, йўловчиларни қозоқ ўт ўчирувчилари қутқарган эди.
2018 йилнинг январь ойида эса Чимкент — Самара йўлининг 1068-километрида Чимкентдан Россиянинг Қозон шаҳрига кетаётган Икарус автобуси ҳаракат давомида ёниб кетиб 52 нафар Ўзбекистон фуқароси ҳалок бўлган эди.
2017 йилнинг июнь ойида Қозоғистоннинг Самара-Чимкент йўлининг 946-километрида салонида 50 нафар Ўзбекистон фуқароси бўлган автобус ағдарилиб кетган эди. Оқибатда 9 ўзбекистонлик ҳалок бўлган, яна 17 нафари тан жароҳати олган.
Изоҳ (0)