Qozog‘istonning Aqto‘be viloyatida 53 nafar O‘zbekiston fuqarolari bo‘lgan Samara—Chimkent yo‘nalishi bo‘ylab harakatlanayotgan Setra avtobusi texnik nosozlik tufayli to‘xtab qoldi, deb xabar bermoqda Tengrinews “Moy gorod” portaliga tayanib.
Qayd etilishicha, voqea Aqto‘be viloyatining Xromtau tumani Don qishlog‘i yaqinida yuz bergan. Hodisa joyiga Xromtau tumani Favqulodda vaziyatlar xizmati xodimlari yetib kelgan va yo‘lovchilarga “Amanat” lageriga evakuatsiya qilishni taklif qilgan, lekin ular buni rad etgan. Shundan so‘ng avtobus ta’mirlash ishlari tugaguncha yo‘lovchilar kutib turishlari uchun hodisa joyiga isitilgan avtobus yuborishga qaror qilingan.
TIV matbuot xizmatining xabar berishicha, O‘zbekistonning Aqtau shahridagi Bosh konsulxonasi ham sodir bo‘lgan voqeani tasdiqladi. Unda aytilishicha, voqea 12-yanvar kuni yuz bergan. Viloyat Favqulodda vaziyatlar departamenti xodimlarining yo‘lovchilarga o‘z vaqtida yordam ko‘rsatgan va ular yaqin oradagi kempingga vaqtincha joylashtirilgan. Tibbiy yordamga ehtiyoj bo‘lmagan.
13-yanvar kuni mahalliy vaqt bilan soat 11:00 da avtobus ta’mirlash ishlari yakunlangach, avtobus o‘z yo‘nalishi bo‘yicha harakatlanishda davom etgan.
Aqto‘beda bunday hodisa birinchi marta sodir bo‘lishi emas. 2019-yilning dekabr oyida Aqto‘beda huddi shu yo‘nalish bo‘ylab harakatlanayotgan va ichida 50 nafar O‘zbekiston fuqarosi bo‘lgan avtobus Aytekebi tumani hududida texnik nosozlik tufayli to‘xtab qolgan edi. Tuman yo‘l-patrul xizmati yo‘lovchilarni evakuatsiya qilish, ularni issiq ovqat bilan ta’minlash va avtobusni ta’mirlashda yordam ko‘rsatgan. Avtobus ta’mirdan keyin harakatni davom ettirgan.
2018-yilning noyabr oyida ham Aqto‘bedagi Samara — Chimkent yo‘lida o‘zbekistonliklarni olib ketayotgan avtobus buzilib qolgan, yo‘lovchilarni qozoq o‘t o‘chiruvchilari qutqargan edi.
2018-yilning yanvar oyida esa Chimkent — Samara yo‘lining 1068-kilometrida Chimkentdan Rossiyaning Qozon shahriga ketayotgan Ikarus avtobusi harakat davomida yonib ketib 52 nafar O‘zbekiston fuqarosi halok bo‘lgan edi.
2017-yilning iyun oyida Qozog‘istonning Samara-Chimkent yo‘lining 946-kilometrida salonida 50 nafar O‘zbekiston fuqarosi bo‘lgan avtobus ag‘darilib ketgan edi. Oqibatda 9 o‘zbekistonlik halok bo‘lgan, yana 17 nafari tan jarohati olgan.
Izoh (0)