Qozog‘istonning Aqto‘be viloyatida avtobusning yonib ketishi oqibatida halok bo‘lgan 52 kishining bari O‘zbekiston fuqarosi bo‘lgan. Bu haqda, Aqto‘be viloyati Favqulodda vaziyatlar bo‘yicha departamenti ma’lumotlariga asoslanib, “RIA Novosti” xabar bermoqda.

Foto: TengriNews

“RIA Novosti”ning Qozog‘iston Ichki ishlar vazirligiga asoslanib qo‘shimcha qilishicha, avtobus haydovchilari qozog‘istonlik bo‘lgan. Avtobusda bundan boshqa mamlakat fuqarolari bo‘lmagan.

Hodisa 18-yanvar kuni mahalliy vaqt bilan 10:30 atrofida, “Samara—Chimkent” yo‘lining 1068-kilometrida yuz bergan. Harakat davomida “Ikarus” avtobusida yong‘in chiqqan, bu vaqtda avtobus salonida 55 yo‘lovchi va ikki haydovchi bo‘lgan.

Yong‘in oqibatida 52 kishi hodisa joyining o‘zida halok bo‘lgan. “Halok bo‘lganlar orasida O‘zbekiston fuqarolari bor”, — deyiladi Qozog‘iston rasmiylari bergan axborotda, biroq o‘zbekistonliklarning soniga aniqlik kiritilmagan. Hozirgi vaqtda fuqarolarning shaxsini aniqlashga kirishilgan.

Hodisa munosabati bilan Aqto‘be viloyatida tezkor shtab tuzilgan, psixologik xizmat tomonidan tezkor aloqa liniyasi yo‘lga qo‘yilgan (telefon raqamlari: +7 7132 56-29-62, +7 7132 56-68-85). Yong‘in joyida politsiyachilar, qutqaruvchilar, shifokorlar va psixologlar ish olib bormoqda.

Bu Qozog‘iston yoki Rossiya bo‘ylab harakatlanayotgan va ko‘p sonli O‘zbekiston fuqarolarining o‘limi bilan tugagan avtobuslar ishtirokidagi so‘nggi bir yilda kuzatilgan birinchi yo‘l-transport hodisasi emas.

2017-yilning 22-iyun kuni Qozog‘istonning Aqto‘be viloyatida, “Samara-Chimkent” yo‘lining 946-kilometrida salonida 50 nafar O‘zbekiston fuqarosi bo‘lgan avtobus ag‘darilib ketgan edi. Oqibatda 9 o‘zbekistonlik halok bo‘lgan, yana 17 nafari tan jarohati olgan.

2017-yilning 6-oktabr kuni Rossiyaning Vladimir viloyatida salonida 55 nafar o‘zbekistonlik bo‘lgan avtobusni temiryo‘l kesishmasida poyezd urib yuborgan edi. Hodisa oqibatida 16 nafar O‘zbekiston fuqarosi halok bo‘lgan. Bu o‘zbekistonliklar ham Rossiyadan O‘zbekistonga qaytayotgan edi.