Халқ депутатлари Тошкент шаҳар Кенгашининг янги сайланган таркиби 13 январь куни ўзининг биринчи сессиясини ўтказди. Унда Президент тақдимномасига асосан шаҳар ҳокимини тасдиқлаш масаласи ҳам кўриб чиқилди.
Ушбу масала бўйича дастлаб сессияда қатнашган Ўзбекистон бош вазири Абдулла Арипов сўзга чиқиб, Ортиқхўжаевнинг замонавий менежер, бошлаган ҳар бир ишини мукаммал қиладиган одам, деб атади.
Бош вазирдан кейин Тошкент шаҳар Кенгашининг бир қатор депутатлари сўзга чиқиб, номзод ҳақида илиқ фикрлар билдирган («Дарё» мухбирининг хабар беришича, улардан бири ҳокимликка айнан Ортиқхўжаев номзоди кўрсатилгани учун миннатдорлик билдирган).
Шундан сўнг овозга қўйилган Тошкент шаҳар Кенгаши томонидан «Ўзбекистон Республикаси Президенти томонидан Тошкент шаҳар ҳокими лавозимига тақдим этилган номзодини тасдиқлаш тўғрисида»ги қарор бир овоздан ма‘қулланган.
Қарсаклар, табриклар, гуллар.
Жаҳонгир Ортиқхўжаев ҳоким этиб тасдиқланганидан сўнг сўзга чиқиб, билдирилган ишончни оқлашга сўз берди.
Изоҳ (0)