Қашқадарёда ҳарбий шаҳарча барпо этилиб, ДХХ чегара қўшинларида хизмат қилувчиларга янги хонадон калитлари топширилди

14 январь — Ватан ҳимоячилари куни муносабати билан Қашқадарё вилоятининг Деҳқонобод туманида Давлат хавфсизлик хизмати чегара қўшинларига қарашли ҳарбий қисмларнинг бирида ҳарбий хизматчиларга 48 хонадондан иборат янги уй топширилди, деб хабар берди «Дарё» мухбири.

Маълум қилинишича, ҳарбий қисмда чегара қўшинларида хизмат қилувчи ходимлар учун спорт зал, 23 ўринли хизмат ётоқхона, ҳарбий техникалар учун автосарой, кутубхона, футбол майдони, теннис корт ва замонавий ошхона ҳам барпо этилган бўлиб, ҳарбий хизматчилар учун шай ҳолатга келтирилган.

Қайд этилишича, ҳарбий шаҳарча Президент Шавкат Мирзиёев ташаббуси билан Вазирлар Маҳкамасининг 2017 йил январь ойидаги қарорига мувофиқ ташкил этилган.

Ҳарбий шаҳарча очилишида иштирок этган ДХХ вилоят бошқармаси, Жануби-ғарбий махсус ҳарбий окрук вакиллари, вилоят ва Деҳқонобод туман ҳокимлиги масъуллари йиғилганларни яқинлашиб келаётган 14 январь — Ватан ҳимоячилари куни билан табриклади.

Тадбир давомида шаҳарчада барпо этилган ҳарбийлар кутубхонасига Деҳқонобод тумани ҳокими Зоир Алиқулов 500 дона китоб совға қилган.