Яна «Арсенал» ва Артета ҳақида

Англия Премьер Лигаси 22-тури доирасида Лондон дербиси бўлиб ўтади. Унда мезбон «Кристал Пэлас» «Арсенал»ни қабул қилади.

Таркибларга назар сола туриб, Микель Артета танлаган футболчилар эътиборимни тортди. Аниқроғи испаниялик мутахассис танлаган таркиб каминага ёқди. Артета турли экспериментлар қилишдан ҳам ёшларга ишонишдан ҳам қочаётгани йўқ. Бироқ менга маъқул келган ўринлардан бири ва асосийси Эмери даврида ишонч билдирилмаган Месут Ўзил ҳамда Николя Пепега катта имконият тақдим этмоқда. Ўз навбатида Ўзил ва Пепе ўзига билдирилган ишончни оқлашни бошлади. Шунингдек, ишончдан чиққан Гранит Жака яна сафга қайтарилди. Аввалроқ сардорлик боғичи ҳам унга қайтарилиши ҳақида хабарлар пайдо бўлганди. Ушбу футболчиларнинг бир вақтда майдонда бўлиши бир тарафдан «Арсенал» ўйинида ранг-барангликни таъминлаши мумкин. Ҳар ҳолда «Челси»га қарши баҳснинг биринчи бўлими, «Манчестер Юнайтед»га қарши бутун ўйин шуни кўрсатди.

«Арсенал»да ҳар доим яхши футболчилар бўлган. Бироқ Анри, Ван Перси каби футболчилардан сўнг топ-даражадагилари деярли келгани йўқ. Тўғри, Ўзил топ футболчи эди. Фақат «Реал»да ва Лондонга келган илк мавсумида. Шундан сўнг унинг ўйинида пасайиш кузатилгани рост. Сўнгги йилларда эса топ мақомига «Арсенал»дан фақатиган Пьер-Эмерик Обамеянг лойиқ кўринмоқда. Ва у бунга мос ўйин кўрсатмоқда. Ҳар ҳолда габонлик «Барса» ёки «Реал»га ўтган тақдирда ҳам ўйнаб кета олишига ишонч билан қараса бўлади.Мавсуминг қолган қисми Артета учун имкониятлар даври бўлади. «Арсенал»дан бу мавсум мухлислар на соврин ва на чиройли ўйин кутади. Аввалоси, «тўпчилар» ўз ўйин услубини топиб олса бўлгани. Мавсум якунида эса Микель таркиб борасида катта ўзгаришлар қилишига ишончим комил. Ахир «Сити»дек клубдан «Арсенал»га ўтаётганда Лондон клуби раҳбариятига ўз шартларини қўйиб шартнома имзолагани аниқ, назаримизда.

Ҳозир эса Лондон дербисини томоша қилишга таклиф қиламиз.