Ижтимоий тармоқларда Наманган вилояти Мингбулоқ тумани ҳокими Нуршод Худойбердиевга мансублиги таъкидланиб, аудиоёзув тарқатилгани ҳақида хабар берилган эди. Аудиоёзувда ҳокимнинг ўз қўл остидагиларини ҳақорат қилгани акс этган.
Мавзуга доир: Сўконғич Мингбулоқ тумани ҳокими қаттиқ огоҳлантирилди. Наманган вилояти прокуратураси унга нисбатан чора кўради
Аниқланишича, 2019 йил 9 декабрь куни соат 10:00 да Мингбулоқ тумани Меҳнатобод МФЙ ҳудудидаги «Гигант» муқобил машина трактор парки саройида Мингбулоқ туман ҳокими вазифасини бажарувчи Нуршод Худойбердиев раҳбарлигида техника ва кузги-қишки агротехник тадбирлар юзасидан йиғилиш ўтказилиб, унда тумандаги «Гигант», «Гулистон», «Гулбоғ-1» ММТП ҳудудлари раислари ҳамда қишлоқ хўжалиги техникаси мавжуд фермер хўжаликлари раҳбарлари иштирок этган.
Йиғилиш давомида туман ҳокими вазифасини бажарувчи Нуршод Худойбердиев «Гулистон дача» фермер хўжалиги иш бошқарувчиси М.Халилов ва бошқа фермер хўжаликлари раҳбарларини қишлоқ хўжалиги техникаларини таъмирламаётгани, сусткашликка йўл қўйиб келаётгани хусусида танбеҳ бериб, сўнг ҳақорат қилгани ҳамда уларнинг шаъни ва қадр-қимматини қасддан камситганлиги аниқланган.
Текшириш натижасига кўра, Наманган вилоят прокуратураси томонидан Нуршод Худойбердиевга нисбатан Ўзбекистон Республикаси Маъмурий жавобгарлик тўғрисидаги кодекснинг 41-моддаси билан маъмурий ҳуқубузарликка доир иш қўзгатиш ҳақида қарор қабул қилиниб, маъмурий чора қўллаш учун тўпланган ҳужжатлар Мингбулоқ тумани маъмурий судига юборилган.
Мингбулоқ тумани маъмурий судининг 2020 йил 10 январдаги қарорига кўра, Нуршод Худойбердиев Маъмурий жавобгарлик тўғрисидаги кодекснинг 41-моддасида назарда тутилган ҳуқуқбузарликни содир этган деб топилиб, унга нисбатан қайд этилган модда билан базавий ҳисоблаш миқдорининг 20 баравари миқдорида, яъни 4 460 000 минг сўм миқдорида жарима жазоси тайинланган.
Изоҳ (0)