Испаниянинг Paradores de turismo de Espana компанияси Самарқанд ва Бухорода меҳмонхоналар қуриш имкониятини кўриб чиқмоқда. Бу ҳақда Ўзбекистон Туризмни ривожлантириш давлат қўмитаси раиси вазифасини вақтинча бажарувчи Абдулазиз Аққулов ва Paradores меҳмонхоналар тармоғи вакиллари билан учрашувда маълум бўлган.
Paradores de turismo de Espana компаниясининг асосий фаолияти тарихий биноларда меҳмонхона хизматларини ташкил қилишга йўналтирилган. Шу сабабли қурилиш истиқболларини баҳолаш учун Испания компанияси вакиллари дастлаб Самарқанд ва Бухородаги тарихий обидаларни ўрганиб чиқди.
Туризмни ривожлантириш давлат қўмитаси хабарига кўра, Испания вакиллари билан учрашув давомида қадимий шаҳарларда Paradores меҳмонхоналари муқобилига мос икки объект — Самарқанддаги Ашратхона ҳамда Бухородаги Тош сарой алоҳида қайд этилди.
«Тарихий меҳмонхоналар»ни яратиш жараёни қуйидагича: компания дастлаб меъморий ёдгорликларнинг асл кўринишини тиклайди, сўнг уларни меҳмонхоналарга айлантиради.
Учрашув якунига биноан Ўзбекистон томон Испания компанияси билан қўшма лойиҳаларни амалга оширишда кўмаклашишга тайёр эканлигини билдирган.
Изоҳ (0)