Самарқандда ярим миллиард сўм маблағни ўзлаштирган мактабгача таълим мансабдорларига жиноят иши қўзғатилди

Самарқандда мактабгача таълим бўлими мансабдорлари боғча жиҳозлари, гилам ва матрасларни атайлаб юқори нархларда харид қилиб, ярим миллард сўмдан ортиқ бюджет маблағларини ўзлаштирган. Бу ҳақда вилоят прокуратурасига таяниб, «Дарё» мухбири Фарҳод Норбўтаев маълум қилмоқда.

Самарқанд вилоят прокуратурасининг ўта оғир жиноятларни тергов қилиш бўлими томонидан олиб борилган дастлабки тергов ҳужжатларига кўра Пахтачи туман МТБ мансабдор шахслари Ўзбекистон Республикасининг «Давлат харидлари тўғрисида»ги қонунининг 26-моддаси (Давлат харидлари қийматини баҳолашга тааллуқли қоидалар) талабларига зид равишда давлат харидлари қийматининг бозор нархларига мувофиқлигини баҳолаш учун очиқ ахборот манбаларидан фойдаланмай келган.

Мансабдорлар тумандаги боғчаларга мебель жиҳозлари, гилам ва матраслар харид қилиш баҳонасида бозор нархидан 518 миллион 823 минг 478 сўм қиммат жиҳозларни сотиб олган.

Аниқланишича, МТБ мансабдор шахслари «Grant Samarkand Invest» МЧЖ томонидан тақдим этилган нархдан келиб чиқиб, товар хом ашёси биржадаги нархларга нисбатан қиммат нархларда «dxarid.uzex.uz» сайтига эълонлар жойлаштирган. Натижада олинган харид таклифларига асосан ёпиқ шаклидаги танлов баённомасини расмийлаштириб, ушбу баённомалар орқали «Gold Brend Mebel» МЧЖ билан 2018 йил 17 декабрда 564 миллион 276 минг сўмлик 214-сонли ҳамда «Cotton Class Tex» МЧЖ билан 2019 йил 27 май куни 627 миллион 239 минг сўмлик шартномалар расмийлаштирган. Ҳадича Сулаймонова номидаги Республика суд экспертизаси маркази Самарқанд вилоят бўлимининг 2019 йил 16 августдаги хулосасига кўра мактабгача таълим ташкилотларига «Gold Brend Mebel» ва «Cotton Class Tex» масъулияти чекланган жамиятлари томонидан етказиб берилган мебель жиҳозлари, гилам ва матраслар бозор баҳосига нисбатан 518 миллион 823 минг 478 сўмга қиммат нархда харид қилинганлиги аниқланган.

Ҳолат юзасидан мактабгача таълим бўлими мансабдор шахслари ва бошқаларга нисбатан Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилган.