Норматив-ҳуқуқий ҳужжатлар лойиҳалари порталига «Тошкент шаҳри қабристонларида гўр қазиш ва маросим хизматлари учун пуллик хизматлар кўрсатиш тарифларини белгилаш тўғрисида»ги қарори лойиҳаси жойлаштирилган эди.
Ушбу қарор лойиҳаси юзасидан журналист, блогерлар, шунингдек ижтимоий тармоқларнинг фаол иштирокчилари турли фикрлар билдирган. Жумладан, «Qalampir.uz» сайтида «Тошкентда ўлиш ‘қанчага тушади?’ Ортиқхўжаев янги қарорни имзолаш арафасида» номли мақола эълон қилинган.
Тошкент шаҳар ҳокимлиги матбуот хизмати ушбу мақола сарлавҳаси ва мазмуни жамоатчилик орасида келиб чиқиши мумкин бўлган турли тушунмовчиликларнинг олдини олиш мақсадида, юқоридаги шаҳар ҳокими қарори лойиҳаси, уни ишлаб чиқишнинг қонуний асослари ва қарордан кўзланган мақсадлар бўйича изоҳ берди.
Унда айтилишича, қарор «Маҳаллий давлат ҳокимияти тўғрисида»ги қонунининг 25-моддасига, «Дафн этиш ва дафн иши тўғрисида»ги қонунининг 15-моддасига, Вазирлар Маҳкамасининг 2011 йил 4 апрелидаги 101-сон қарори билан тасдиқланган «Дафн этиш жойларини сақлаш, улардан фойдаланиш ва қабр усти ёдгорликларини ўрнатиш тартиби тўғрисида»ги Низомнинг 8-бандига асосан ишлаб чиқилган.
Бугунгача айнан шу мазмундаги Тошкент шаҳар ҳокимининг 2015 йил 27 октябрда 924-сонли, 2016 йил 28 январда 74-сонли ҳамда 2018 йил 3 майда 708-сонли қарорлари қабул қилинган.
Пуллик хизматлар кўрсатиш масаласи Вазирлар Маҳкамасининг 2011 йил 4 апрелидаги 101-сон қарори билан тасдиқланган «Дафн этиш жойларини сақлаш, улардан фойдаланиш ва қабр усти ёдгорликларини ўрнатиш тартиби тўғрисида»ги Низомнинг 8-бандида белгиланган.
Унда гўр қазиш ва маросим хизматлари бўйича ишчиларга эга бўлиш кўрсатилган пуллик хизматлар учун аҳолидан тушган маблағлар ҳисобидан, маҳаллий давлат ҳокимияти органлари, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланадиган тарифлар бўйича амалга оширилиши кўрсатиб ўтилган.
Шунингдек, таъкидланишича, Ўзбекистон Президентининг «Ўзбекистон Республикаси Адлия вазирлиги фаолиятини янада такомиллаштиришга доир ташкилий чора-тадбирлар тўғрисида»ги қарорига асосан 2018 йил 1 майдан бошлаб барча норматив-ҳуқуқий ҳужжатлар лойиҳалари лойиҳани ишлаб чиқувчи ташкилотлар томонидан Ягона интерактив давлат хизматлари порталига жамоатчилик муҳокамаси ўтказилиши учун жойлаштирилиши лозимлиги белгиланган.
«Юқоридагилардан келиб чиқиб, ҳамда Тошкент шаҳар Ободонлаштириш бош бошқармаси ҳузуридаги Фуқароларга хизмат кўрсатиш бошқармасининг гўр қазиш ва маросим хизматлари учун ойлик иш ҳақи, тахта ва ёқилғи-мойлаш маҳсулотлари ҳамда бошқа ашёларнинг нархи сезиларли даражада ошиши муносабати билан янги таърифларни белгилаш тўғрисидаги мурожаатига кўра, Тошкент шаҳар ҳокимининг ‘Тошкент шаҳри қабристонларида гўр қазиш ва маросим хизматлари учун пуллик хизматлар кўрсатиш тарифларини белгилаш тўғрисида’ги қарори лойиҳаси тайёрланган ва regulation.gov.uz сайтига жойлаштирилган», — дейилади хабарда.
Ҳокимлик журналист ва блогерлардан, шунингдек ижтимоий тармоқларнинг фаол иштирокчиларидан давлат ва жамият аҳамиятига молик маълумотлар юзасидан фикр ва мулоҳаза билдиришда, билдирилаётган муносабатнинг ҳуқуқийлик, маданият ва этика нормалари доирасида бўлишига жиддий эътибор қаратишларини сўраган.
Изоҳ (0)