«Daryo.uz» сайтида 2019 йил ноябрь ойида «Тўртинчи қаватдан тушиб кетган 4 ёшли Алибек зудлик билан операция қилиниши зарур» сарлавҳали мақола эълон қилинган эди.
Мақолада 2017 йилнинг ёз ойида тўртинчи қаватдан йиқилиб тушиб, қаттиқ жароҳат олган, томоғига қўйилган пласмасса найча орқали нафас олаётган тўрт ёшли Алибек зудлик билан операция қилиниши кераклиги, операцияга 2500 доллар миқдорида зарур маблағ талаб этилиши , бироқ оиланинг моддий аҳволи оғирлиги ҳақида сўз юритилган эди.
«Daryo.uz» сайтида эълон қилинганидан сўнг, саховатли инсонлар томонидан етарли маблағ йиғилди.
Алибек зудлик билан шифохонага ётқизилди. У ерда Россиянинг энг кучли жарроҳлари томонидан 3 соатлик жарроҳлик амалиётини бошидан ўтказди. Яқинларининг айтишича, жарроҳлик амалиёти жуда мураккаб тарзда бўлиб ўтган.
Амалиёт давомида болакайнинг бўйнидаги азоб бераётган найча олиб ташланди. Онасининг айтишича, узоқ муддатли даволаниш муолажалари ва жарроҳлик амалиётидан сўнг, Алибек мустақил нафас ола бошлаган. Ўзини жуда яхши ҳис қиляпти.
«Авваломбор Аллоҳдан, кейин фарзандимнинг даволаниши ва операсияси учун моддий томондан ёрдам қўлини чўзган, маънавий томондан қўллаб- қувватлаган саховатпеша юртдошларимиздан, ватандошларимизнинг барча-барчаларидан мингдан минг бор миннатдорман. Ҳамиша уларнинг ҳақига дуода бўламан» — дейди Алибекни онаси Моҳичеҳра опа.
Шу ўринда биз ҳам Алибекнинг ҳаётига бефарқ бўлмай ёрдам қўлини чўзган, мақолани улашган барча инсонларга ўз миннатдорчилигимизни билдириб ўтамиз. Яхшиликларингиз сабаб бугун тўрт яшар Алибек оғриқлардан фориғ бўлди. Бу оиланинг қўллари ҳамиша сиз учун дуода. Қилган эҳсонларингиз ўз даргоҳида қабул бўлсин!
Изоҳ (0)