Normativ-huquqiy hujjatlar loyihalari portaliga “Toshkent shahri qabristonlarida go‘r qazish va marosim xizmatlari uchun pullik xizmatlar ko‘rsatish tariflarini belgilash to‘g‘risida”gi qarori loyihasi joylashtirilgan edi.
Ushbu qaror loyihasi yuzasidan jurnalist, blogerlar, shuningdek ijtimoiy tarmoqlarning faol ishtirokchilari turli fikrlar bildirgan. Jumladan, “Qalampir.uz” saytida “Toshkentda o‘lish ‘qanchaga tushadi?’ Ortiqxo‘jayev yangi qarorni imzolash arafasida” nomli maqola e’lon qilingan.
Toshkent shahar hokimligi matbuot xizmati ushbu maqola sarlavhasi va mazmuni jamoatchilik orasida kelib chiqishi mumkin bo‘lgan turli tushunmovchiliklarning oldini olish maqsadida, yuqoridagi shahar hokimi qarori loyihasi, uni ishlab chiqishning qonuniy asoslari va qarordan ko‘zlangan maqsadlar bo‘yicha izoh berdi.
Unda aytilishicha, qaror “Mahalliy davlat hokimiyati to‘g‘risida”gi qonunining 25-moddasiga, “Dafn etish va dafn ishi to‘g‘risida”gi qonunining 15-moddasiga, Vazirlar Mahkamasining 2011-yil 4-aprelidagi 101-son qarori bilan tasdiqlangan “Dafn etish joylarini saqlash, ulardan foydalanish va qabr usti yodgorliklarini o‘rnatish tartibi to‘g‘risida”gi Nizomning 8-bandiga asosan ishlab chiqilgan.
Bugungacha aynan shu mazmundagi Toshkent shahar hokimining 2015-yil 27-oktabrda 924-sonli, 2016-yil 28-yanvarda 74-sonli hamda 2018-yil 3-mayda 708-sonli qarorlari qabul qilingan.
Pullik xizmatlar ko‘rsatish masalasi Vazirlar Mahkamasining 2011-yil 4-aprelidagi 101-son qarori bilan tasdiqlangan “Dafn etish joylarini saqlash, ulardan foydalanish va qabr usti yodgorliklarini o‘rnatish tartibi to‘g‘risida”gi Nizomning 8-bandida belgilangan.
Unda go‘r qazish va marosim xizmatlari bo‘yicha ishchilarga ega bo‘lish ko‘rsatilgan pullik xizmatlar uchun aholidan tushgan mablag‘lar hisobidan, mahalliy davlat hokimiyati organlari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadigan tariflar bo‘yicha amalga oshirilishi ko‘rsatib o‘tilgan.
Shuningdek, ta’kidlanishicha, O‘zbekiston Prezidentining “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi qaroriga asosan 2018-yil 1-maydan boshlab barcha normativ-huquqiy hujjatlar loyihalari loyihani ishlab chiquvchi tashkilotlar tomonidan Yagona interaktiv davlat xizmatlari portaliga jamoatchilik muhokamasi o‘tkazilishi uchun joylashtirilishi lozimligi belgilangan.
“Yuqoridagilardan kelib chiqib, hamda Toshkent shahar Obodonlashtirish bosh boshqarmasi huzuridagi Fuqarolarga xizmat ko‘rsatish boshqarmasining go‘r qazish va marosim xizmatlari uchun oylik ish haqi, taxta va yoqilg‘i-moylash mahsulotlari hamda boshqa ashyolarning narxi sezilarli darajada oshishi munosabati bilan yangi ta’riflarni belgilash to‘g‘risidagi murojaatiga ko‘ra, Toshkent shahar hokimining ‘Toshkent shahri qabristonlarida go‘r qazish va marosim xizmatlari uchun pullik xizmatlar ko‘rsatish tariflarini belgilash to‘g‘risida’gi qarori loyihasi tayyorlangan va regulation.gov.uz saytiga joylashtirilgan”, — deyiladi xabarda.
Hokimlik jurnalist va blogerlardan, shuningdek ijtimoiy tarmoqlarning faol ishtirokchilaridan davlat va jamiyat ahamiyatiga molik ma’lumotlar yuzasidan fikr va mulohaza bildirishda, bildirilayotgan munosabatning huquqiylik, madaniyat va etika normalari doirasida bo‘lishiga jiddiy e’tibor qaratishlarini so‘ragan.
Izoh (0)