Жиноий уюшма таркибида товламачилик, бюджет маблағларини талон-торож қилиш ва чет эл давлатларда жиноий даромадларини легаллаштириш каби жиноятларни содир этган Гулнора Каримова ва бошқаларга нисбатан бўлган жиноят иши юзасидан олиб борилган тергов ҳаракатлари якунланди, деб хабар бермоқда Бош прокуратура матбуот хизмати.
Қайд этилишича, ҳозирда жиноят иши мазмунан кўриб чиқиш учун айблов хулоса билан судга юборилган.
Эслатиб ўтамиз, ўтган йилнинг декабрь ойида ўтказилган тергов жараёнида Гулнора Каримова ўзига яқин шахслардан иборат бўлган бир неча уюшган жиноий гуруҳларни ташкил этган ҳолда жиноий уюшмани бошқариб келгани, шунингдек, унга республика саноат корхоналарида фаолият юритган ва жуда кўп миқдордаги жиноий даромадлардан улуш бериб келган яна бир уюшган жиноий гуруҳга эга бўлгани аниқланган эди.
Бош прокуратура мазкур тергов қилинаётган жиноят иши доирасида етказилган зарар миқдори 165 миллион доллар ва 85 миллиард сўмдан кўпроқни ташкил қилганини таъкидлаган.
Гулнора Каримовага Жиноят кодексининг тегишли моддаларида назарда тутилган товламачилик, талон-торож қилиш, Ўзбекистоннинг манфаатларига хилоф равишда битимлар тузиш ва жиноий уюшмани ташкил этиш билан боғлиқ жиноятларини содир этганлиги бўйича янги айблов эълон қилинган ва унга нисбатан жиноят ишлари бўйича Яшнобод туман судининг ажрими билан қамоққа олиш тарзидаги эҳтиёт чораси қўлланилган.
Изоҳ (0)