Президент Шавкат Мирзиёев 6 январь куни Ўзбекистон мусулмонлари идораси раиси муфтий Усмонхон Алимовни қабул қилиб, унинг 70 йиллик таваллуд айёми билан табриклади.
Президент матбуот хизматининг хабар беришича, давлат раҳбари Усмонхон Алимовнинг миллий ва диний қадриятларни тиклаш, асраб-авайлаш, буюк алломалар, мутафаккирларнинг бой илмий меросини ўрганиш ва тарғиб қилиш ҳамда жамиятда диний бағрикенгликни мустаҳкамлашга бағишланган фаолиятига алоҳида тўхталиб ўтди.
Ўзбекистон Мусулмонлари идораси раҳбари нафақат юртимиз ва Марказий Осиёда, балки дунё миқёсида тан олинган нуфузли уламолардан бири экани, унинг Ислом олами уюшмаси таъсис мажлиси ҳамда Бутун дунё уламолар кенгаши аъзоси этиб сайлангани, «Дунёнинг энг нуфузли 500 мусулмони» рўйхатидан муносиб ўрин эгаллагани бутун Ўзбекистон халқига улкан фахр бағишлаши таъкидланди.
«Биз муфтий ҳазратларини Ислом маърифатининг толмас тарғиботчиси сифатида биламиз ва қадрлаймиз. ‘Тафсири Ирфон’, ‘Имом Бухорий – муҳаддислар султони’, ‘Оилада фарзанд тарбияси’ каби асарларингиз халқимиз қалбидан чуқур жой олган», — деган Президент.
Шавкат Мирзиёев Усмонхон Алимовнинг Ўзбекистонда Ислом маданияти ва илм-фанини ривожлантириш, ислом динининг инсонпарварлик моҳияти ва эзгу ғояларини, улуғ аллома ва мутафаккирларнинг бебаҳо илмий меросини тадқиқ этиш ва халқаро миқёсда кенг тарғиб қилиш ишларига қўшган муносиб ҳиссаси, шунингдек, диний ва дунёвий билимларни пухта эгаллаган етук мутахассисларни тайёрлаш йўлидаги ибратли фаолиятининг юксак эътироф рамзи сифатида унга «Эл-юрт ҳурмати» орденини топширди.
Муфтий Усмонхон Алимов Президентга юксак мукофот учун ташаккур билдириб, сўнгги йилларда жамият ҳаётининг барча жабҳалари қатори диний-маърифий соҳада ҳам улкан ислоҳотлар амалга оширилаётганини таъкидлаган.
Изоҳ (0)