Jinoiy uyushma tarkibida tovlamachilik, budjet mablag‘larini talon-toroj qilish va chet el davlatlarda jinoiy daromadlarini legallashtirish kabi jinoyatlarni sodir etgan Gulnora Karimova va boshqalarga nisbatan bo‘lgan jinoyat ishi yuzasidan olib borilgan tergov harakatlari yakunlandi, deb xabar bermoqda Bosh prokuratura matbuot xizmati.
Qayd etilishicha, hozirda jinoyat ishi mazmunan ko‘rib chiqish uchun ayblov xulosa bilan sudga yuborilgan.
Eslatib o‘tamiz, o‘tgan yilning dekabr oyida o‘tkazilgan tergov jarayonida Gulnora Karimova o‘ziga yaqin shaxslardan iborat bo‘lgan bir necha uyushgan jinoiy guruhlarni tashkil etgan holda jinoiy uyushmani boshqarib kelgani, shuningdek, unga respublika sanoat korxonalarida faoliyat yuritgan va juda ko‘p miqdordagi jinoiy daromadlardan ulush berib kelgan yana bir uyushgan jinoiy guruhga ega bo‘lgani aniqlangan edi.
Bosh prokuratura mazkur tergov qilinayotgan jinoyat ishi doirasida yetkazilgan zarar miqdori 165 million dollar va 85 milliard so‘mdan ko‘proqni tashkil qilganini ta’kidlagan.
Gulnora Karimovaga Jinoyat kodeksining tegishli moddalarida nazarda tutilgan tovlamachilik, talon-toroj qilish, O‘zbekistonning manfaatlariga xilof ravishda bitimlar tuzish va jinoiy uyushmani tashkil etish bilan bog‘liq jinoyatlarini sodir etganligi bo‘yicha yangi ayblov e‘lon qilingan va unga nisbatan jinoyat ishlari bo‘yicha Yashnobod tuman sudining ajrimi bilan qamoqqa olish tarzidagi ehtiyot chorasi qo‘llanilgan.
Izoh (0)