Таниқли иқтисодиётчи Беҳзод Ҳошимовнинг фикрича, Евросиё иқтисодий иттифоқида иқтисодиётдан кўра сиёсат кўпроқ. У бу ҳақда Лазизбек Ҳамидовнинг «Улар» дастурига берган интервьюсида айтиб ўтди.
Евросиё иқтисодий иттифоқи кўпроқ сиёсат. Уни сиёсий иттифоқ деб ўйлайман. Унинг таг замирида асосан сиёсий жиҳатлар ётибди. Масалан, МДҲ билан Эркин савдо ҳудуди тўғрисида келишув бор. Шунинг учун Евросиё иқтисодий иттифоқи ўзига аъзо мамлакатлар ичида савдога қандайдир кескин бир таъсир кўрсатади, дейишдан йироқман. Шунинг учун бу асосан сиёсий ташкилот.Иттифоққа қўшилиш-қўшилмаслик ҳақида сиёсатчилар гапириши керак. Сиёсий қарорларнинг иқтисодий қарорлардан кўра қийинроқ томони, қарор қабул қилаётганда бутун бир тенгламани билмайман. Ташқи сиёсий муносабатларда ўзига хос олди-бердилар бор, доимо бир нарсани бериб, эвазига бир нарсани оласиз. Уларнинг мана шу тенгламасини, ниманинг ўрнига нимани алишаётганимизни мен билмайман.
Балки биз кўпроқ нарса олаётгандирмиз, мен билмайман, шунинг учун ҳам ҳозир бу яхши савдоми ёки ёмон савдоми, буни айта олмайман. Бу иттифоқнинг иқтисодий тарафига қарайдиган бўлсак, бу деярли муҳим эмас. Россияда ишлаётган ватандошларимизнинг ҳаёти осонлашади, деган фикр бор, лекин у ҳам сиёсий масала. Чунки Россия ҳозир ҳам Ўзбекистон фуқароларига нисбатан патентни бекор қилиши мумкин. Ўзи бу патентларнинг борлиги ҳам қандайдир сиёсий босим деб ўйлайман.
Шунинг учун, айтмоқчиманки, Евросиё иқтисодий иттифоқи бўйича қарор — тўлиқ сиёсий.
Беҳзод Ҳошимов, иқтисодиётчи
Изоҳ (0)