Taniqli iqtisodiyotchi Behzod Hoshimovning fikricha, Yevrosiyo iqtisodiy ittifoqida iqtisodiyotdan ko‘ra siyosat ko‘proq. U bu haqda Lazizbek Hamidovning “Ular” dasturiga bergan intervyusida aytib o‘tdi.
Yevrosiyo iqtisodiy ittifoqi ko‘proq siyosat. Uni siyosiy ittifoq deb o‘ylayman. Uning tag zamirida asosan siyosiy jihatlar yotibdi. Masalan, MDH bilan Erkin savdo hududi to‘g‘risida kelishuv bor. Shuning uchun Yevrosiyo iqtisodiy ittifoqi o‘ziga a’zo mamlakatlar ichida savdoga qandaydir keskin bir ta’sir ko‘rsatadi, deyishdan yiroqman. Shuning uchun bu asosan siyosiy tashkilot.Ittifoqqa qo‘shilish-qo‘shilmaslik haqida siyosatchilar gapirishi kerak. Siyosiy qarorlarning iqtisodiy qarorlardan ko‘ra qiyinroq tomoni, qaror qabul qilayotganda butun bir tenglamani bilmayman. Tashqi siyosiy munosabatlarda o‘ziga xos oldi-berdilar bor, doimo bir narsani berib, evaziga bir narsani olasiz. Ularning mana shu tenglamasini, nimaning o‘rniga nimani alishayotganimizni men bilmayman.
Balki biz ko‘proq narsa olayotgandirmiz, men bilmayman, shuning uchun ham hozir bu yaxshi savdomi yoki yomon savdomi, buni ayta olmayman. Bu ittifoqning iqtisodiy tarafiga qaraydigan bo‘lsak, bu deyarli muhim emas. Rossiyada ishlayotgan vatandoshlarimizning hayoti osonlashadi, degan fikr bor, lekin u ham siyosiy masala. Chunki Rossiya hozir ham O‘zbekiston fuqarolariga nisbatan patentni bekor qilishi mumkin. O‘zi bu patentlarning borligi ham qandaydir siyosiy bosim deb o‘ylayman.
Shuning uchun, aytmoqchimanki, Yevrosiyo iqtisodiy ittifoqi bo‘yicha qaror — to‘liq siyosiy.
Behzod Hoshimov, iqtisodiyotchi
Izoh (0)