Фарғонадаги Ал-Фарғоний номидаги истироҳат боғида 2 январь куни инсон ўлими билан тугаган фавқулодда ҳолат юз берди. Бу ҳақда Бош прокуратура матбуот хизмати «Дарё»га маълум қилди.
Booster Max номли аттракцион ишлаб турган вақтида унинг болтлари ечилиб, деталларидан бири чиқиб кетган. Ушбу детал аттрационда учаётган 32 ёшли Н.Ю. исмли аёлнинг бошига келиб тушган.
«Аёл тан жароҳати олиб, Республика шошилинч тиббий ёрдам илмий маркази Фарғона филиалига олиб борилган ва кўрсатилган тиббий ёрдамга қарамай вафот этган», — дейилади расмий ахборотда.
Қайд этишларича, ҳодиса юзасидан Фарғона шаҳар прокуратураси терговолди текширув олиб бормоқда. Маълум бўлишича, фожиага сабаб бўлган аттракцион 2019 йил декабрида боғга ўрнатилган.
Аввалроқ Намангандаги «Афсоналар боғи»да бир эҳтиётсизлик оқибатида аттракционнинг темир трубасига урилиб, вафот этган эди. Ундан аввалроқ эса Жиззахдаги «Истиқлол» болалар боғида «Учар ликопча» аттракциони тутқичи синиб, узилиб тушиши оқибатида бир қиз вафот этган, Самарқанддаги ишлаб турган аттракциондан бир қиз отилиб чиқиб кетган эди.
Намангандаги фожиадан сўнг вилоят ҳокимлиги ҳудуддаги барча аттракционлар текширилиши ҳақида баёнот берганди. Жиззахдаги фожиадан сўнг эса Саноат хавфсизлиги давлат қўмитаси мамлакатдаги барча аттракционларда текширувлар ўтказиб, Ўзбекистонда ишлаб чиқарилган аттракционлар талабга тўлиқ жавоб бермаслиги ҳақида хулоса берганди.
Изоҳ (0)