Туркия яқин икки кун ичида Ливияга ҳарбийларнинг биринчи гуруҳини юборади, деб хабар берди «Коммерсантъ».
Аввалроқ Туркия парламенти мамлакат президенти Ражаб Тоййиб Эрдўғоннинг Ливиядаги Миллий келишув ҳукуматига ҳарбий ёрдам юбориш ҳақидаги сўровини маъқуллади.
Айни пайтда Ливияда параллель равишда иккита ижро ҳокимияти органи фаолият олиб бормоқда: Фаиз Саражнинг халқаро даражада тан олинган Миллий келишув ҳукумати ва мамлакат шарқида парламент билан биргаликда амалда бўлган ва фельдмаршал Халифа Хафтарнинг Ливия миллий армияси томонидан қўллаб-қувватланаётган Абдулла Абдураҳмон ат-Тонийнинг вақтинчалик маҳкамаси.
Халифа Хафтар ўтган йилнинг 12 декабрь куни унинг қуролли кучлари пойтахт учун ҳал қилувчи жангга киришаётганини маълум қилган. Ливия миллий армияси қўмондонлиги мамлакатга ҳар қандай бошқа давлатнинг кириб келишига қарши туришини бир неча бор таъкидлаган ҳамда Туркиянинг ҳарбий ёрдам ортилган кемаларини чўктириб юбориш ва юк самолётларини уриб тушириш билан таҳдид қилган.
23 декабрь куни Ливия Миллий келишув ҳукумати раҳбари Фаиз Сараж Анқарага ҳарбий ёрдам сўраб мурожаат қилганини тасдиқлади. Ноябрь ойида Туркия ва Ливия ўртасида имзоланган ҳарбий соҳадаги ҳамкорлик тўғрисидаги меморандум ерусти, денгиз ва ҳаво операцияларида техникалар, қурилмалар ва қурол-яроғ етказиб беришни кўзда тутади.
Изоҳ (0)