Turkiya yaqin ikki kun ichida Liviyaga harbiylarning birinchi guruhini yuboradi, deb xabar berdi “Kommersant”.
Avvalroq Turkiya parlamenti mamlakat prezidenti Rajab Toyyib Erdo‘g‘onning Liviyadagi Milliy kelishuv hukumatiga harbiy yordam yuborish haqidagi so‘rovini ma’qulladi.
Ayni paytda Liviyada parallel ravishda ikkita ijro hokimiyati organi faoliyat olib bormoqda: Faiz Sarajning xalqaro darajada tan olingan Milliy kelishuv hukumati va mamlakat sharqida parlament bilan birgalikda amalda bo‘lgan va feldmarshal Xalifa Xaftarning Liviya milliy armiyasi tomonidan qo‘llab-quvvatlanayotgan Abdulla Abdurahmon at-Toniyning vaqtinchalik mahkamasi.
Xalifa Xaftar o‘tgan yilning 12-dekabr kuni uning qurolli kuchlari poytaxt uchun hal qiluvchi jangga kirishayotganini ma’lum qilgan. Liviya milliy armiyasi qo‘mondonligi mamlakatga har qanday boshqa davlatning kirib kelishiga qarshi turishini bir necha bor ta’kidlagan hamda Turkiyaning harbiy yordam ortilgan kemalarini cho‘ktirib yuborish va yuk samolyotlarini urib tushirish bilan tahdid qilgan.
23-dekabr kuni Liviya Milliy kelishuv hukumati rahbari Faiz Saraj Anqaraga harbiy yordam so‘rab murojaat qilganini tasdiqladi. Noyabr oyida Turkiya va Liviya o‘rtasida imzolangan harbiy sohadagi hamkorlik to‘g‘risidagi memorandum yerusti, dengiz va havo operatsiyalarida texnikalar, qurilmalar va qurol-yarog‘ yetkazib berishni ko‘zda tutadi.
Izoh (0)