2019 йил 30 декабрь куни Андижон вилоят маъмурий судининг очиқ суд мажлисида Асака туман ички ишлар бўлими томонидан фуқаро Абдуфатто Нуритдинов (блогер Отабек Нуритдинов)га оид Маъмурий жавобгарлик тўғрисидаги кодекснинг 40-моддаси (туҳмат), 41-моддаси (ҳақорат) ва 183-моддаси (майда безорилик) билан юритилган маъмурий иш кўриб чиқилган.
Суд қарорига кўра, Абдуфатто Нуритдинов Маъмурий жавобгарлик тўғрисидаги кодексининг 40-моддаси, 41-моддаси ва 183-моддасида назарда тутилган ҳуқуқбузарликларни содир этганликда айбли деб топилиб, унга Маъмурий жавобгарлик тўғрисидаги кодекснинг 34-моддаси тартибида узил-кесил ўташ учун 15 сутка маъмурий қамоқ жазоси тайинланган.
Олий суд матбуот хизмати раҳбари Азиз Обидовнинг «Дарё»га хабар беришича, 3 январь, жума куни ҳуқуқбузар Абдуфатто Нуритдинов томонидан Андижон вилоят маъмурий судига шу суднинг 2019 йил 30 декабрдаги қарори устидан кассация тартибида шикоят келтирилган бўлиб, ушбу шикоят асосида Абдуфатто Нуритдиновга оид маъмурий иш вилоят судининг кассация инстанциясида кўриш учун расмийлаштирилди.
Мазкур маъмурий ишни кассация тартибида кўриб чиқиш бўйича очиқ суд мажлиси 2020 йил 4 январь, шанба куни соат 11:00 га тайинланган.
Аввалроқ АОКА директори Комил Алламжонов ушбу ҳолат юзасидан ўз муносабатини билдирган эди.
Изоҳ (0)