2019-yil 30-dekabr kuni Andijon viloyat ma’muriy sudining ochiq sud majlisida Asaka tuman ichki ishlar bo‘limi tomonidan fuqaro Abdufatto Nuritdinov (bloger Otabek Nuritdinov)ga oid Ma’muriy javobgarlik to‘g‘risidagi kodeksning 40-moddasi (tuhmat), 41-moddasi (haqorat) va 183-moddasi (mayda bezorilik) bilan yuritilgan ma’muriy ish ko‘rib chiqilgan.
Sud qaroriga ko‘ra, Abdufatto Nuritdinov Ma’muriy javobgarlik to‘g‘risidagi kodeksining 40-moddasi, 41-moddasi va 183-moddasida nazarda tutilgan huquqbuzarliklarni sodir etganlikda aybli deb topilib, unga Ma’muriy javobgarlik to‘g‘risidagi kodeksning 34-moddasi tartibida uzil-kesil o‘tash uchun 15 sutka ma’muriy qamoq jazosi tayinlangan.
Oliy sud matbuot xizmati rahbari Aziz Obidovning “Daryo”ga xabar berishicha, 3-yanvar, juma kuni huquqbuzar Abdufatto Nuritdinov tomonidan Andijon viloyat ma’muriy sudiga shu sudning 2019-yil 30-dekabrdagi qarori ustidan kassatsiya tartibida shikoyat keltirilgan bo‘lib, ushbu shikoyat asosida Abdufatto Nuritdinovga oid ma’muriy ish viloyat sudining kassatsiya instansiyasida ko‘rish uchun rasmiylashtirildi.
Mazkur ma’muriy ishni kassatsiya tartibida ko‘rib chiqish bo‘yicha ochiq sud majlisi 2020-yil 4-yanvar, shanba kuni soat 11:00 ga tayinlangan.
Avvalroq AOKA direktori Komil Allamjonov ushbu holat yuzasidan o‘z munosabatini bildirgan edi.
Izoh (0)