Ўзбекистонда 2018 йилнинг декабрь ойида контракт тўлови учун ўтказилган иш ҳақига солиқ имтиёзини бутунлай бекор қилиш таклиф қилинган эди. 2019 йилнинг 30 декабрида Президент томонидан имзоланган янги таҳрирдаги Солиқ кодексида ушбу имтиёз сақлаб қолинди.
Ҳуқуқшунос Хушнудбек Худойбердиев ўз Telegram-каналида маълум қилишича, имтиёз аввалгидан ҳам кенгайиб, энди турмуш ўртоғининг (эр ёки хотин) контракти учун ўтказилган иш ҳақидан ҳам даромад солиғи олинмайдиган бўлди.
Аввалги Солиқ кодексининг 179-моддаси 31-бандига биноан фуқароларнинг солиқ солинадиган иш ҳақи ва бошқа даромадларининг Ўзбекистон олий ўқув юртларида таълим олиш учун (ўзининг ўқиши ёки 26 ёшга тўлмаган фарзандларининг ўқиши учун) йўналтириладиган суммалари даромад солиғидан озод қилинар эди.
Масалан, ота ўз фарзандининг контракти учун иш ҳақининг бир қисмини, айтайлик, 1 миллион сўмини тўғридан тўғри институт ҳисобига ўтказади. Бунинг учун институтдан шартнома (ҳисоб-рақам) олиб, ташкилот бухгалтериясига ариза бериб қўйиш керак эди. Бундай вазиятда агар ота 3 миллион сўм ойлик олса, демак фарзандининг контракти учун ўтказган 1 миллион сўмдан даромад солиғи ушланмас, фақат қолган 2 миллион сўмдан солиқ олинарди.
Эътиборли томони, фақат ўзининг ёки 26 ёшга тўлмаган фарзандининг контракти учунгина шундай имтиёз берилган. Турмуш ўртоғи, ака-укаси, келини ёки бошқа қариндошларининг контракти учун иш ҳақидан ўтказилса, ҳеч қандай имтиёз қўлланмаган.
Янги таҳрирдаги Солиқ кодексининг 378-моддаси 16-бандига биноан Ўзбекистоннинг олий ўқув юртларида таълим олиш (ўзининг, 26 ёшга тўлмаган фарзандларининг ёки эрининг (хотинининг) таълим олиши) учун йўналтириладиган солиқ солиниши лозим бўлган иш ҳақи ва бошқа даромадларига солиқ солинмайди.
Яъни қуйидаги 3 тоифанинг контракти учун ўтказилган иш ҳақларидан даромад солиғи ушланмайди:
- фуқаро ўзининг контрактига ўтказса;
- 26 ёшга тўлмаган фарзандининг контрактига ўтказса;
- эрининг (хотинининг) контрактига ўтказса.
Изоҳ (0)