Самарқанддаги марказий кўчада ёмғир сабаб ер чўкиши содир бўлиб, автобус чуқурликка тушиб кетди (видео)

3 январь, жума куни соат тахминан 9:30 атрофида Самарқанд шаҳридаги Рудакий кўчасида «Полвон Ариқ» МЧЖга қарашли автобус чуқурликка тушиб кетди.

Транспорт вазирлиги Самарқанд вилоят бошқармаси ахборот хизматининг «Дарё»га маълум қилишича, Малик Асманов бошқарувида бўлган автобус 2 январь, пайшанба куни ёққан ёмғир натижасида Рудакий кўчасида ковланган қисмида ботиб қолган. Оқибатда йўловчилардан бирининг автобусда қўли қайрилиб, шифохонага олиб борилган. Автобус махсус техника ёрдамида чуқурликдан чиқариб олинган.

«Дарё» мухбири Фарҳод Норбўтаевнинг хабар беришича, газ, сув ва электр таъминотини яхшилаш мақсадида Самарқанд шаҳридаги қазилган айрим кўчаларнинг чуқурлари тўлдирилган бўлсада, 2 январь куни ёққан ёмғир натижасида уларнинг аксарияти кўчган.

Самарқанд шаҳар ҳокимлиги ахборот хизматининг таъкидлашича, ёмғир натижасида юзага келган айрим муаммоларни бартараф этиш бўйича жойларда ишлар олиб борилмоқда.

«Рудакий кўчасида ҳам қазиш ишларини олиб бориш ва кўчани таъмирлашда камчиликларга йўл қўйилган ва кучли ёмғир оқибатида йўлнинг ўша қисмида кўчиш ҳолати келиб чиққан. Мазкур кўчани таъмирлаб бўлгунга қадар уни ёпиш бўйича Самарқанд шаҳар ҳокими фармойиш қабул қилди», — дейди Самарқанд шаҳар ҳокимлиги ахборот хизмати раҳбари Абдужаббор Пўлатов.

Айни пайтда Минтақавий йўлларга буюртмачи инжиниринг компанияси томонидан Рудакий кўчасининг Беруний кўчасидан Гагарин кўчасигача бўлган қисмида реконструкция ишлари бошланди.

https://youtu.be/qCFJmT0Q-R0