Facebook ижтимоий тармоғида «Отабек Нуритдинов» тахаллуси билан воқеа-ҳодисаларга ўз муносабатини билдириб келган фуқаро Абдуфатто Нуритдинов туҳмат, ҳақорат ва безориликда айбланиб 15 сутка маъмурий қамоқ билан жазоланган эди.
Воқеа юзасидан Андижон вилояти ҳокимлиги матбуот хизмати видео баёнот берган, 30 декабрь куни эса ушбу иш юзасидан Андижон вилояти маъмурий судининг очиқ суд мажлиси бўлиб ўтганди.
Олий Мажлис Қонунчилик палатаси депутати Расул Кушербаев блогер Отабек Нуриддинов иши ва Андижон вилояти ҳокимилиги матбуот хизмати баёноти бўйича муносабат билдирди.
Отабек Нуриддиновнинг масъуллар ишини танқид қилгани учун Асакадаги бир гуруҳ мансабдорлар томонидан ўзаро тил бириктириб жазолатгани яна ҳам ойдинлашмоқда.Расул Кушербаев бундан аввал ҳам ҳодисага муносабат билдириб, ИИБ ва бошқа органларнинг яшин тезлигида ахборот тарқатгани ва ўз фикрларини баён қилгани учун фуқарони жазолашга эришгани қандайдир буюртмани бажаргандек таассурот қолдираётганини қайд этганди.Шу ўринда Андижон вилояти ҳокимияти матбуот хизмати томонидан ўта нохолис, ишончсиз ва бир ёқлама тайёрланган баёнотни кўриб чиқиб, уларга қуйидагиларни эслатмоқчиман.
Биринчидан, фуқаро-блогер ишлатган ҳароми, деган сўз ҳақоратга кирмайди. Бу Фарғона мисолида ўз исботини топган.
Иккинчидан, бир фуқаронинг ортидан пойлаб қадамма-қадам юриб, материаллар тўплаш ИИБ ходими учун пасткаш иш. Мен билган «форма» кийганлар мард ва олийжаноб, энг муҳими, ҳақиқий эркак кишилар. Ҳалиям бу фикримда қоламан: уларга пасткашлик ярашмайди.
Учинчидан, фуқаро-блогер устидан арз қилганлар ушбу фуқаро томонидан танқидга учраган шахслар бўлгани боис бу ишни кўриб чиқиб, қарор қабул қилинишида холислик бўлмаган, деб ўйлайман. Айланиб ҳам ўргилиб ҳам фуқаро масъулларнинг фаолиятини танқид қилгани учун жазолангани фактлигича қоляпти. Бу фуқаролик жамиятини ривожлантириш йўлида жуда ёмон сигнал.
Тўртинчидан, қонунларни амалга татбиқ қилишда тенгликка риоя қилинмай мансабдорлар учун ўта енгил, фуқаро учун ўта оғир ёндашув бўлмоқда. Ҳоким ҳақорат қилса, исботланмайди ёки нари борса кечирим сўралади, фуқаро ҳақорат эмас танқид қилса ҳам қамалади.
Бешинчидан, энг ёмони уюштирилган шу ишни кўриб чиқиб, адолатли қарор қабул қилиш имкони бўлган суд ҳам адолатсизлик қилиб, Ўзбекистон номидан бир фуқарони фикр билдиргани, танқид қилгани ва ўзининг фуқаролик позициясини намоён қилгани учун жазолаган. Эссиз, зўравонлик асли биз суянган, ишонган, мустақил қиламиз ва тақдиримизни ишонамиз, деган доно суд орқали қилинмоқда. Ҳайф бўлсин.
Бундан чиқди вазиятдан келиб чиқиб фуқаро сифатида конституциявий ҳуқуқимдан фойдаланиб билдирган танқидий фикрлар учун ҳам мени суд қарори билан жазо кутмоқдами?
Сўнгида айтар сўзим: Асака масъуллари ҳайф сизга, сиз адолатсиз, танқидни кўтара олмайдиган, давлат раҳбари намуна бўлиб олиб бораётган очиқлик йўлидаги ислоҳотларни тушунмайдиган, ўз ўрнига номуносиб шахслар экансиз. Яхшиси ўрнингизни халқпарвар, адолатли, давлат раҳбарининг сиёсатини тўғри англаб қўллаб-қувватлайдиганларга бўшатиб беринг!
Расул Кушербаев, Олий Мажлис Қонунчилик палатаси депутати
Изоҳ (0)