Жиззах шаҳрида 22 декабрь, якшанба куни 18 ва 19 ёшли икки йигит калити ичида қолдирилган Lacetti автомобилини олиб қочди. Бу ҳақда Ички ишлар вазирлиги ҳузуридаги Тергов департаменти хабар берди.
Маълум қилинишича, 22 декабрь куни тахминан соат 02:55 да 35 ёшли Ш.Ҳ. Жиззах шаҳри ИИБга мурожаат қилган. Фуқаронинг маълум қилишича, у ўзининг Lacetti русумли автомашинасини уйи олдида калити ўт олдириш жойига тиқилган ҳолатда қолдирган.
Ш.Ҳ. тахминан соат 02:50 да шовқин овозини эшитиб, ташқарига чиққан. Шу вақтда номаълум шахс автомашина эшик ойнасини синдириб, ичида қолдирган калит билан автомашинани ўт олдириб, номаълум томонга ҳайдаб кетган.
Мазкур ҳолат юзасидан Жиззах шаҳар ИИБ ҳузуридаги Тергов бўлими томонидан Ўзбекистон Республикаси Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Олиб борилган тергов-тезкор тадбирлари натижасида ушбу жиноятни 18 ёшли Х.Ж. ва 19 ёшли Б.Р. содир этганлиги аниқланган. Х.Ж. ва Б.Р.га нисбатан Жиноят кодексининг 267-моддаси 2-қисми «б» банди билан айблов эълон қилиниб, қамоққа олиш тарзидаги эҳтиёт чораси қўлланилган.
Ҳозирда дастлабки тергов ҳаракатлари давом эттирилмоқда.
Изоҳ (0)