Тошкентда 4 машина иштирокидаги ЙТҲда 1 ёшга тўлмаган қиз вафот этди, 3 киши касалхонага ётқизилди

Тошкентнинг Чилонзор тумани Бунёдкор кўчасида юз берган ЙТҲда 1 ёшга тўлмаган қиз вафот этди, 3 киши касалхонага ётқизилди.

ЙҲХББ матбуот хизматининг хабар беришича, воқеа 25 декабрь куни соат 17:00 ларда содир бўлган. Тошкентнинг Чилонзор туманида яшовчи 20 ёшли ҳайдовчи Т.М. Lacetti автомобилини бошқараётиб, қарама-қарши йўналишга чиқиб кетган.

У қаршисидан ҳаракатланиб келаётган 30 ёшли ҳайдовчи М.А. бошқарувидаги «Жигули» (ВАЗ-2106) русумли, 57 ёшли Х.А. бошқарувидаги «Газел» («ГАЗ-330202») юк машинаси ҳамда 34 ёшли О.А. бошқарувидаги Damas автомобиллари билан тўқнашган.

Оқибатда «Жигули» ҳайдовчиси ва 52 ёшли йўловчиси Н.И. тан жароҳати олиб касалхонага ётқизилган, яна 2 йўловчига амбулатор ёрдам кўрсатилган. Ҳайдовчининг машинада бўлган 1 ёшга тўлмаган қизи А.Д. касалхонага олиб борилганида вафот этган.

Lacetti’нинг 19 ёшли йўловчиси Т.Б. тан ҳам жароҳати олиб, касалхонага ётқизилган. Автомобиль ҳайдовчиси ва яна 2 йўловчига тиббий ёрдам кўрсатилган.

Damas ҳайдовчиси ва барча йўловчиларига ҳам амбулатор ёрдам кўрсатилган.