«Қонунни етказиш бўйича тизим йўқ». Танзила Норбоева Адлия вазирлигини танқид қилди

Ўзбекистонда «Фуқароларнинг репродуктив саломатлигини сақлаш тўғрисида»ги қонун ишламаяпти, умуман репродуктив саломатлик тўғрисидаги қонунчилик тарғиботи йўлга қўйилмаган. Бу фикр Сенат раиси Танзила Норбоева томонидан билдирилди, дея хабар бермоқда «Дарё» мухбири Мусулмонбек Иброҳимов.

Сенат Кенгашининг 24 декабрь куни бўлиб ўтган кенгайтирилган йиғилишида умумий овқатланиш корхоналари ва таълим тизимида аҳолининг санитария-эпидемиологик осойишталигига оид қонун ҳужжатларининг ижросини ўрганиш натижаларини кўриб чиқилгани ҳақида аввал хабар берилган эди. Йиғилишда Сенат раиси Адлия вазирлигини ҳам танқид қилган.

«Мана, «Фуқароларнинг репродуктив саломатлигини сақлаш тўғрисида’ги қонунни олайлик. У ҳам ишламаяпти. Бу бошқа мавзу бўлса ҳам майли — масала шундаки, қонун умуман ишлаётгани йўқ. Куни кеча адлия вазири: ‘Бизда тизим зўр бўлди, қонунни ҳаммага етказиш тизими бор’, деди. Лекин, мана, ҳеч қанақа тизим йўқ», — деди Сенат раиси.

Танзила Норбоева айнан шу йиғилишда соғлиқни сақлаш вазири Алишер Шодмоновга кун тартибидаги масалага «жиддий муносабат» билдиргани учун унга қўштирноқ ичида «салом» йўллаган эди. 25 декабрь куни вазир парламент юқори палатаси раҳбарининг «саломи»га жавоб қайтарди, шундан сўнг Сенат вазир устидан ҳукуматга хат йўллагани маълум бўлди.