Туркия Триполидаги Миллий келишув ҳукуматидан қўшинларни жўнатиш ҳақидаги сўров келиб тушган тақдирда, Ливияга ҳарбийларни жўнатиш имкониятини кўриб чиқишга тайёр. Бу ҳақда Туркия президенти Ражаб Тоййиб Эрдўғон Тунисда бўлиб ўтган матбуот анжуманида маълум қилди, деб ёзмоқда «ТАСС».
Эрдўғоннинг сўзларига кўра, Туркия бирор бошқа мамлакат ҳудудида мазкур мамлакат ҳукуматининг таклифисиз бўлмаган. Агар тегишли таклиф келиб тушса, Туркия уни кўриб чиқади.
Бундан ташқари, Эрдўғон айни пайтда Ливияда «Вагнер» хусусий ҳарбий компаниясининг камида икки минг жангчиси мавжудлигини маълум қилди. Унинг сўзларига кўра, Ливияда Суданнинг ҳам беш мингдан ортиқ жангчиси бор.
23 декабрь куни Ливия Миллий келишув ҳукумати раҳбари Фаиз Сараж Анқарага ҳарбий ёрдам сўраб мурожаат қилганини тасдиқлади. Ноябрь ойида Туркия ва Ливия ўртасида имзоланган ҳарбий соҳадаги ҳамкорлик тўғрисидаги меморандум ерусти, денгиз ва ҳаво операцияларида техникалар, қурилмалар ва қурол-яроғ етказиб беришни кўзда тутади.
Айни пайтда Ливияда параллель равишда иккита ижро ҳокимияти органи фаолият олиб бормоқда: Фаиз Саражнинг халқаро даражада тан олинган Миллий келишув ҳукумати ва мамлакат шарқида парламент билан биргаликда амалда бўлган ва фельдмаршал Халифа Хафтарнинг Ливия миллий армияси томонидан қўллаб-қувватланаётган Абдулла Абдураҳмон ат-Тонийнинг вақтинчалик маҳкамаси. Халифа Хафтар 12 декабрь куни унинг қуролли кучлари пойтахт учун ҳал қилувчи жангга киришаётганини маълум қилган. Ливия миллий армияси қўмондонлиги мамлакатга ҳар қандай бошқа давлатнинг кириб келишига қарши туришини бир неча бор таъкидлаган ҳамда Туркиянинг ҳарбий ёрдам ортилган кемаларини чўктириб юбориш ва юк самолётларини уриб тушириш билан таҳдид қилган.
Изоҳ (0)